El fenómenu de la vivienda turística tamién golpea con fuercia en Avilés. En tres años y mediu, el conceyu recibió 76 solicitudes pa apartamentos turísticos, que sumen 168 places, a les que se xunten otres 32 n’edificios enteros que van ser rehabilitaos con esi mesmu fin. Un total de 200 cames que sumen a les 732 esistentes en pisos turísticos

Agora mesmo y acordies a les estadístiques oficiales de la Conseyería de Turismu, el conceyu cuenta con 732 places en pisos turísticos frente a 702 en hoteles y pensiones tradicionales. Ye dicir, hai yá más capacidá pa turistes n’edificaciones que nun tributen pa esi usu que na hostelería profesionalizada. Una dinámica que nun para de crecer: en 2022 malpenes se pidieron dos llicencies, pero en 2024 foron 42 apartamentos los nuevos, y no que vamos de 2025 yá van 22 solicitudes más. 

El resultáu: en bona parte del centru históricu y de los barrios con más tirón inmobiliariu, les cases que podríen sirvir pa vecinos acaben convertíes en lofts pa fines de selmana o pa ser ocupaos unos meses al añu.

El modelu que se ta imponiendo ye’l de la compra y rehabilitación d’edificios enteros nel centru de la ciudá, destinaos a un públicu con mayor poder adquisitivu. Exemplos claros son’l antiguu Café Colón, en plenu procesu de conversión en 18 apartamentos con 72 places, o’l edificiu d’Èmile Robin con Los Telares, que solicitó llicencia pa 20 apartamentos y 36 places.

Pa los promotores, ye una “puesta en valor” del patrimoniu urbanu. Pa munchos vecinos, ye’l principiu d’una espulsión silenciosa: los alquileres tradicionales mengüen, los precios súbense y cada vez ye más difícil atopar vivienda estable nel centru d’Avilés.

L’afitamientu d’esti modelu tien un efeutu direutu: la vivienda dexa de cumplir la so función social, la de garantizar un techu pa la población, pa convertise n’un negociu especulativu venceyáu a los ciclos del turismu.

Les families moces topen torgues xorrecientes pa instalase, y munches persones que yá vivíen en zones céntriques ven cómo los sos contratos nun se renueven porque’l propietariu quier pasar al mercáu turísticu, más rentable a curtiu plazu.

Al mesmu tiempu, la vida comunal dexenera: barrios enteros camuden de vecinos con identidá propia a escenarios de pasu, onde’l turismu tien el protagonismu y la xente residente queda reducida.

El Principáu y los conceyos anuncien un nuevu decretu que impondrá requisitos más duros (máx. 8 places, baños pa ca cuatro persones, etc.) pero la realidá ye que l’espoxigue  va más rápido que la regulación, y mientres se tramiten les normes, la ciudá camuda. Eso considerando namás les places llegales, el tarrén de los alquileres illegales ye entá más fondu.

El casu d’Avilés pon enriba la mesa un debate que supera les cifres: ¿qué tipu de ciudá se ta construyendo? ¿Un espaciu pensáu pa quien vien de pasu, o una ciudá con accesu a vivienda digna pa la so xente? el riesgu ye claro: perder vecinos pa ganar apartamentos, perder identidá pa ganar un escaparate. Y eso, a la fin, ye hipotecar el futuru d’Avilés, el futuru d’Asturies.

Nel Dos Santos

This work is licensed under a Creative Commons Attribution 4.0 International License.