Les bases del concursu d’esti 2025 inclúin dos estayes: poesía escrita por muyeres y ensayu con mirada de xéneru.
La Conseyería de Presidencia, Retu Demográficu, Igualdá y Turismu, per aciu del Institutu Asturianu de la Muyer, vuelve a poner en marcha’l Premiu Amparo Pedregal, que premia tanto la creación lliteraria como la investigación feminista. El galardón rinde memoria a la hestoriadora y docente Amparo Pedregal (1960-2015), figura clave del feminismu académicu en Asturies, que defendió de manera constante los derechos de les muyeres y de la que’l so llabor sigue siendo referencia nos campos de la coeducación y la llexislación antidiscriminatoria.
La cuantía total del premiu algama los 5000 euros, repartíos en dos bloques: 2500 € pa la categoría de trabayos lliterarios y otros 2500 € pa la d’investigación.
Na parte lliteraria, la convocatoria ta pensada esclusivamente pa muyeres que presenten obres inédites. Ca añu escuéyese un xéneru distintu, y nesta edición correspuénde-y a la poesía. Podrán presentase autores mayores d’edá, nacíes o residentes n’Asturies, amás de descendientes hasta segundu grau de la emigración asturiana. Tamién se contemplen obres colectives. El requisitu mínimu d’estensión ye de 30 páxines.
Pela so parte, la segunda categoría céntrase n’investigaciones nueves y non publicaes previamente, que tengan como exe la igualdá ente homes y muyeres. Nesti apartáu la convocatoria ta abierta a cualquier persona mayor d’edá vinculada a Asturies —por nacencia, residencia o descendencia hasta segundu grau— Les obres tendrán d’oscillar ente les 150 y les 350 páxines, y el tribunal va tener en cuenta la seriedá metodolóxica, la novedá de les aportaciones y la posibilidá d’aplicar los resultaos a la realidá social.
El plazu pa presentar les obres vence’l 5 de setiembre de 2025. Les candidatures van poder formalizase tanto per vía presencial (rexistru, corréu postal, etc.) como per mediu electrónicu. Les bases integraes tán disponibles na web oficial de la convocatoria.
Susana Sela
This work is licensed under a Creative Commons Attribution 4.0 International License.
