El Parque Natural de Fontes del Narcea, Degaña e Ibias, reconocíu como Reserva de la Biosfera pola UNESCO y parte de la Rede Natura 2000, cumple yá cuasi diez años ensin un plan de xestión vixente.
De magar 2016, cuando’l Tribunal Superior de Xusticia d’Asturies anuló’l instrumentu de xestión entós aprebáu por nun tener una memoria económica que fixera costar les compensaciones a los propietarios, esti espaciu de 567 km² quedó ensin normativa clara.
Esti vacíu llegal tien consecuencias direutes: según l’investigador Rolando Rodríguez, representante de les asociaciones ecoloxistes na Xunta Rectora del Parque, “nun hai normativa que sostenga la illegalidá de les posibles agresiones al parque”. L’ausencia d’un marcu regulador fai imposible determinar qué pue facese y qué non, polo que resulta difícil perseguir ataques como l’apertura de pistes forestales illegales.
Fructuoso Pontigo, voceru de la Coordinadora Ecoloxista d’Asturies, alerta de que la falta d’un plan convierte la reserva nuna “bomba”, ensin cartografía que delimite zones sensibles nin un control efeutivu de les actividaes que se realicen dientro. Esti desorde ye, al so ver, un factor añadíu de riesgu na prevención d’incendios.
Precisamente, la zona suroccidental asturiana, onde s’asitia’l parque, ye la más afeutada polos fueos d’estos díes. Con una masa forestal de fayeos y carbayeos que sirvieron d’abellugu a especies como’l pitu montés o l’osu pardu cantábricu, l’ausencia d’un plan de xestión afonda’l peligru pa la conservación d’esti espaciu natural únicu.
Nel Dos Santos
This work is licensed under a Creative Commons Attribution 4.0 International License.
