El conceyu d’Uviéu y ArcelorMittal pacten ampliar la cantera del Naranco ensin atender les alegaciones vecinales
L’alcuerdu ente’l Conceyu d’Uviéu y la empresa ArcelorMittal S.A. pa la Modificación Puntual del Plan Xeneral d’Ordenación (PGO) de la ciudá, col oxetivu d’ampliar la industria estractiva El Naranco na parte güei protexida pola normativa vixente, foi asoleyáu polos medios de comunicación ensin que se tuvieren en cuenta les alegaciones presentaes pola Coordinadora Ecoloxista d’Asturies.
La cantera entamó la so esplotación en 1964 y ta asitiada na fastera norte del Monte Naranco, dientro de la parroquia de Villapérez. La concesión tien más de 400 hectárees, de les cuales 201,31 ha tán yá trabayaes, nun espaciu que s’estiende d’este a oeste con una llonxitú de 3,6 km y un frente variable de norte a sur ente 240 y 850 metros nos sos puntos más anchos.
Agora, el Conceyu d’Uviéu autoriza la incorporación de 5,34 hectárees d’un área clasificada hasta’l momentu como Suelu Non Urbanizable d’Especial Protección Monte Naranco.
L’área nueva d’esplotación pretende asitiase na fastera norte del Naranco, con visibilidá direuta dende los conceyos de Llanera y Les Regueres. Trátase d’una zona de gran valor paisaxísticu y natural, protexida por un plan especial que se quier modificar agora pa dexar abrir la cantera en plena masa forestal de robles (Quercus robur), fresnos (Fraxinus excelsior), arces (Acer pseudoplatanus), chopos (Populus nigra), castaños (Castanea sativa), amás de presencia d’encina (Quercus ilex), sauces (Salix spp.), ablanos (Corylus avellana) y toxos (Ulex spp.).
Nel entornu más cercanu a la cantera atópense les aldegues de Llugarín, Llaiñes, Folgueres, Quintana, Villanueva, Nora y la Pedrera, toles elles dientro del conceyu d’Uviéu. Nel conceyu de Llanera, les llocalidaes de La Vega y Cadage lleven décades sufriendo los efeutos negativos de la esplotación: ruiu, polvu, contaminación del aire y un aumentu costante del tráficu pesáu.
Dende la Coordinadora y colectivos vecinales rescamplen la necesidá d’estremar les midíes de proteición p’amenorgar l’impactu, teniendo en cuenta los antecedentes de la esplotación actual y los problemes de salú y calidá de vida que provoca.
Amás, l’actual sistema d’esplotación nin favorez la reducción del impautu paisaxísticu nin facilita la restauración y apantallamientu de les zones esgotaes. La meyor preba d’ello ye la falta de recuperación ambiental en munches partes de la cantera, que pese a llevar décades ensin usase siguen ensin restaurar.
Susana Sela
This work is licensed under a Creative Commons Attribution 4.0 International License.
