Un millar d’antitaurinos percorrieron ayeri Xixón al gritu de “la tortura nun ye cultura”, culminando una selmana de movilizaciones contra la tauromaquia, una práutica ayena y cruel qu’Asturies lleva refugando activamente dende va más d’un sieglu
Asturies Antitaurina foi la convocante d’esti manifestamientu, cellebráu coincidiendo cola cabera corrida de la Feria de Begoña 2025 n’El Bibio. Baxo’l lema ‘Asturies ensin tortura’, la comitiva salió a les 16:30 hores de la Plazuela de San Miguel y percorrió distintes cais de la ciudá hasta llegar a la plaza de toros, onde se vivieron momentos de tensión ente manifestantes y asistentes al espectáculu.
A lo llargo del percorríu, les consignes más repitíes fueron ‘La tortura nun ye cultura’ o ‘Esta plaza vamos zarrala’. Dellos participantes portaben pancartes xigantes coles cares de gües y un caballu y nun faltaron banderes y mascotes acompangando la protesta.
La portavoz de Asturies Antitaurina, Fernanda Blanco, espresó que “volvemos a manifestar el nuesu refugu a esti espectáculu. Nun tienen cabida na sociedá asturiana nin en nenguna parte”. Blanco criticó amás la postura de la alcaldesa Carmen Moriyón, de la que dixo que “como mélica tenía de ser la primera n’entender el dolor d’un animal que sufre igual que nós”.
Un elementu destacáu foi l’entrega de 30.000 firmes recoyíes n’Asturies que reclamen la retirada de la tauromaquia del catalogu de padremuñu cultural español, figura que la protexe de la llei que considera delitu’l maltratu animal.
La protesta llegó ensin incidents graves hasta les inmediaciones d’El Bibio, anque se produxeron cruces de gritos, insultos y xestos ofensivos ente manifestantes y asistentes a la corrida.
A la fin, la comitiva antitaurina lleó un manifiestu a cargu de la profesora y escritora Marian Moreno Llaneza, qu’interpretó la voz del toro sacrificáu: “Quiero fuxir pero nun puedo… Grito pero la música tapa la mio voz… Gracias por lluchar pa que esta barbarie tenga fin”. La protesta concluyó entonando’l himnu ‘Xixón del alma’, mui apropiau si se tien en cuenta la llarga hestoria antitaurina de la ciudá.
Yá en 1914, la Sociedá Antiflamenquista Cultural entamó un manifestamientu en Xixón contra la Feria de Begoña. Dende entós, la presión social fizo que les corríes de toros amenguaren hasta quedar llendaes a esti eventu añal en Xixón, calteníu gracies a sovenciones públiques.
Argumentos como la brutalidá, la crueldá o la imposición cultural del españolismu más ranciú son recurríos pola sociedá civil y por formaciones como Andecha Astur, que defenden “una Asturies llibre de matances de toros y d’espectáculos crueles que na tienen que ver cola nuesa cultura y tradición”
El movimientu antitaurín asturianu revindica una identidá cultural propia, estremada de la española na so rellación colos animales, y desixe’l fin d’unes corríes de toros que consideren crueldá, barbarie, imposición y maltratu.
Susana Sela
This work is licensed under a Creative Commons Attribution 4.0 International License.
