Na so intervención Llucía Fernández llamó a vencer el conformismu derrotista y a xunise pa llograr un meyor futuru p’Asturies “Hai muncho por facer. Hai una Asturies por salvar, un futuru meyor por costruyir.”

Los incendios impidieron qu’acudieren al homenaxe la representación Llionesa que tolos años ta presente, asina como asturianos de fasteres menaciaes polos fueos.

Sicasí, foron un par de decenes de persones les que s’averaron al Puertu a homenaxear al Conseyu Soberanu.

La xornada d’homenaxe entamó a les diez de la mañana, cola xubía a les trincheres de la Filispardi dende’l Puertu Tarna. Ellí llantaron una asturina, depués de comprebar in situ la tremenda fazaña d’aquellos homes y muyeres qu’escavaron les trincheres no alto’l monte pa defender el país frente a les tropes facistes españoles. 

A la vuelta, ya nel Puertu, xuntáronse coles persones que ya esperaben pal homenaxe floral ente’l monumentu llantáu na llende ente Asturies y Llión, en remembranza de la hestórica declaración de Soberanía, cola que’l Conseyu llibrábase del xugu que suponía la República española, y asumía la defensa de la so independencia y soberanía.

La intervención política abrióse con un llamáu a remembrar qu’esta foi la segunda declaración d’independencia d’Asturies nel sieglu pasáu y a reconocer el Conseyu Soberanu d’Asturies y Llión comu la cabera istitución democráticamente escoyía pol pueblu asturianu, una bones l’actual Estatutu d’Autonomía que carecemos foi impuestu a los asturianos ensin posibilidá de decisión “Frente a un ‘Principado’ y un Estatutu impuestos dende Madrid, un Conseyu proclamáu soberanu pol pueblu asturianu, frente al sucursalismu, la sumisión y el servilismu, la Soberanía del Pueblu Asturianu pa decidir llibremente’l so futuru”.

Llucía Fernández llamó a superar el derrotismu que llastra a los asturianos “lleven más d’ochenta años repitiéndomos que perdimos, que somos unos perdedores, al tiempu que se mos oculta la heroicidá de los que, siendo pocos y piqueños, dieron la cara ante xigantes.  Ye verdá, crecimos con esi complexu de que ser nos taba mal” afitó, dando’l pasu a les nueves xeneraciones d’asturianos y asturianes que, llibres d’esi complexu tienen per delantre la llabor de lluchar por un futuru soberanu p’Asturies, refiriéndose con ello non solo a los asturianos de nacimientu y a los d’ascendencia, sinón a tolos que llegaos de cualisquier parte del mundiu tengan l’enfotu común de crear una Asturies soberana, una Asturies meyor na que vivir un futuru dignu.”A toos esos asturianos y asturianes convocamos, a xunise como entos y crear otres trincheres, otres casamates, feches agora de decisiones, de pallabres, de votos, que cola mesma xunidá qu’entós mos permitan algamar el futuru qu’el pueblu asturianu merez”. 

Pa finar, recalcó nel significáu de la pallabra soberanía y la so emportancia nel díi ente díi del pueblu asturianu “Soberanía ye decidir que país somos, si, pero ye tamién decidir que les perres van pa bomberos y non pa miradores turísticos, que los carbayos tienen equi el so llugar perriba los ocalitos, que Peñamayor y Salave nun son nomes de mines si los sos moraores nun quieren, que los parques de bateríes nun son una opción y que les viviendes son pa vivir, non pa veraneantes. Soberanía ye decidir.  Por ello cellebramos, homenaxeamos, damos les gracies y reconocemos con arguyu a los que tuvieron el valor de ser soberanos”. 

Nel Dos Santos

This work is licensed under a Creative Commons Attribution 4.0 International License.