Radiografía de la situación de la mocedá en 2025: más dificultá pa acceder a la vivienda, una tasa de paru del 14,6% y emplegos concentraos nos sectores más precarizaos
N’ Asturies, una persona nueva tien que destinar ente’l 50% y el 70% del so salariu pa pagar un alquiler o una hipoteca. Esta situación, xunto a salarios más baxos que la media y una mayor vulnerabilidá cuando se queden en paru, eleva’l so riesgu de probitú. Según el Conseyu de la Mocedá, en 2023 un de ca tres mozos y moces de 16 a 29 años taba en riesgu de probitú o esclusión social, más d’un 33% frente a un 25,3% del conxuntu de la población. La tasa asturiana ye la más alta del Estáu tres d’Andalucía y Canaries.
Según el informe Les persones moces nel mercáu llaboral asturianu en 2025 de CCOO, la población de 16 a 35 años suma 162.900 persones (16% del total). D’elles, participen nel mercáu llaboral ente seis y siete de cada diez, con una tasa de paru del 14,6%, seis puntos más que’l conxuntu de la población (8,6%). La tasa d’emplegu xuvenil algama’l 56%, pero sigue llueñe de les cifres previes a la crisis de 2008.
El 58% de la mocedá asturiana tien estudios superiores, más que la media estatal, pero’l 30% ta sobrecualificáu y trabaya en puestos d’inferior nivel educativu. Los sectores con más emplegos xuveniles son la hostelería (17%) y el comerciu minorista (11%), les dos árees más precarizaes.
La temporalidá contractual sigue alta (27%) y la contratación a tiempu parcial medró un 9,7%, frente a un 2,3% la indefinida. Los salarios xuveniles son un 8,6% inferiores a la media estatal de los mozos y un 23,5% más baxos que’l salariu mediu xeneral. Cola precariedá, el paru y les barreres d’accesu a la vivienda como principales torgues, la mocedá asturiana ve afeutada tamién la so salú mental.
Nel Dos Santos
This work is licensed under a Creative Commons Attribution 4.0 International License.
