Los vecinos de Villayana alcen la voz contra’l proyectu d’istalación d’un parque de bateríes al par de les sos cases, cuya autorización alministrativa previa espublizóse hai poco nel Boletín Oficial del Principáu d’Asturies (BOPA).
La infracadarma, promovía pola empresa BESS Development SL, tendría una capacidá de 13,7 MW y 37,62 MWh. El so allugamientu, ente los conceyos de Mieres y L.lena, incumpliría les distancies de seguridá que marca la llei: taría a menos de 160 metros de les viviendes, a 50 del calce del ríu, y a menos de 40 de la carretera y de les víes del tren. Ello prevocó una fonda preocupación ente los vecinos, que denuncien nun ser informaos previamente del proyectu.
Por mor d’ello los moraores de Villayana convocaron una xunta’l próximu 14 d’agostu na que decidir les midíes a tomar, ente les que podríen tar la presentación d’allegaciones pela vía legal y la organización d’aiciones de protesta.
Na so llucha nun tán solos: cuenten col sofitu de coleutivos como la Asociación de Vecinos de Carabanzo —que nel so momentu frenó la istalación d’un parque asemeyáu nel so territoriu—, la Coordinadora Ecoloxista d’Asturies y Andecha Astur. Esta organización yá entamare una campaña informativa sobro los riesgos qu’esti tipu d’infracadarmes supón pa la población, amás de denunciar que esto ye un ñiciu más de “lo que representa la mal llamada ‘transición enerxética’ impuesta dende Madrid: una estratexa al serviciu de les grandes corporaciones que convierte Asturies nun apéndiz industrial y nun territoriu de sacrificiu”.
Susana Sela
This work is licensed under a Creative Commons Attribution 4.0 International License.
