La Plataforma Ciudadana Contra la Quema de CSR repartió información sobre les consecuencies de la quema de CSR nel Día d’Hunosa na Feria Muestres
Un grupu de persones aconceyo na entrada la Feria de Muestres con una pancarta onde podía lleese “Quemar CSR/basoria na Pereda – Mieres mata”, repartiendo información sobre les consecuencies d’esa triba de quemes. L’acción forma parte de la campaña “Quemar CSR/Basura Mata” y con ella pretenden alertar a la ciudadanía de toa Asturies sobre los pelligros de la quema de basories propuesta pol Gobiernu d’Asturies pa la térmica de la Pereda de Mieres.
La composición media de los CSR n’Europa ye un 31 % de plásticos, un 13 % de papel y cartón, un 12 % de maera, un 14 % de testiles y un 30 % d’otros materiales. La quema conxunta d’esta mecigaya de borrafes ye tremendamente contaminante y pelligroso pa la salú, alvierten dende la plataforma.
N’Asturies recíclase malpenes el 23% de los residuos urbanos, bien perbaxo del 50% desixíu por Europa y la pior tasa del estáu. Amburar esa basoria nun pue ser una solución, especialmente teniendo en cuenta los abondos estudios de siguimientu de la combustión de basories n’estremaes istalaciones comu térmiques, cementeres o incineradores amuesen que la quema ta lloñe de ser inocua, emitiéndose sustancies de peralta tosicidá, comu metales pesaos (cadmiu, plomu, mercuriu, cromu, cobre, etc.) y compuestos orgánicos, ente los que destaquen les diosines y furanos. Estos estudios no duden en venceyar la esposición a estos compuestos col desendolcu de cáncanos, enfermedaes respiratories o malformaciones y en sorrayar el so impautu nes estayes más vulnerables comu la reciella.
Susana Sela
This work is licensed under a Creative Commons Attribution 4.0 International License.
