El Festival Intercélticu de Lorient cellébrase del 1 al 10 d’agostu de 2025, con una temática principal dedicada a los “Cousins d’Amérique”, destacando la influyencia de la cultura celta americana (Canadá, Nova Scotia, EE. UU., Acadie…) en toles so manifestaciones
El solemne izáu de banderes naguró güei a les dos de la tardi un añu nel que, seique Asturies nun seya la protagonista d’esti añu, la representación asturiana ye abondosa, cola Banda Gaites La Reina’l Truebano ya’l Grupu Baille San Felix, qu’aportaron güei al festival y qu’actuarán a lo llargo del mesmu tanto n’actuaciones puntuales comu nes espectaculares nueches máxiques. Amás, Actuará la banda avilesina de folk Guieldu, la cantante y compositora Marisa Valle Roso y el grupu de power folk Alienda, Eva Tejedor y Les Pandereteres ya’l guitarrista Rubén Bada, quien tendrá una presencia destacada al participar nel conciertu “Sur les routes des Celtes du Sud”, nel que tará acompangáu de Pepín Muñalén y Xabier Díaz Quartet -y que también protagonizará’l “Celtic Odysée #4”. La propuesta asturiana complétase con una “master class” de gaita que impartirá’l músicu Pablo Carrera, a la que se suma una esposición dedicada al traxe’l país y que se titula “El vistir”. Amás de tou ello, ya ta presente nel festival una delegación de la Revista LA SIDRA qu’aparte de recoyer información del desendolcu del festival esparderá pente la xente de los países celtes información sobre la Cultura Asturiana de la Sidra.
Llucía F. Marqués
This work is licensed under a Creative Commons Attribution 4.0 International License.
