El pagu d’una tasa turística comu la qu’Andecha Astur lleva años proponiendo, que’l so beneficiu fuere a parar a los conceyos onde se recalda, apurriría los fondos pa meyorar los servicios que, comu’l de depuración de residuos, se ven saturaos pol xorrecimientu de la población causáu pol turismu
Tolos branos xorrez la población que vive nos pueblos costiegos asturianos y tolos años los sistemes de depuración d’agües residuales, camentaos pa una población menor, nun son quien a xestionar los desfechos xeneraos pola suma de la población propia ya’l turismu. ¿El resultáu? Playes contaminaes con residuos fecales, sableres presllaes al bañu y persones con problemes de salú; más entá cuando’l Principáu miente al respeutu
Esi ye’l casu de lo que pasa güei en Gozón. Los datos oficiales de la Conseyería de Salú del Gobiernu d’Asturies consideren que les agües de Bañugues nun tan aptes pal bañu y asina lo señala un cartelu na mesma sablera, puestu pol propiu conceyu.
La información espublizada na web del Principado xenera confusión y pon en pelligru la salú de los usuarios de la sablera de Bañugues, al apaecer na páxina web qu’informa de la calidá de les agües de les playes asturianes comu ‘Apta pal bañu’, pesi a tar afeutada pola presencia de Enterococo intestinal y Escherichia coli.
Aparte de la irresponsabilidá de nun actualizar la información na so web, esti fechu, que nun ye aislláu y que repite añu tres añu en dellos conceyos asturianos, apunta a un problema mayor: el mal saneamientu de zones comu la de Gozón, con un sistema de saneamientu llastráu por una depuradora que nun furruló bien enxamás y que si bien tira polos residuos de los habitantes de la fastera nun puede, por contra, colos xeneraos pola sobrepoblación que trai consigu’l turismu.
D’ehí que dende Andecha Astur lleve años proponiéndose’l pagu d’una tasa turística que revierta sobre les necesidaes de cada propiu conceyu, de manera que nun seyan los moraores de tol añu los que carguen colos sobrecostos de dar serviciu a una población flotante multiplicada’n branu.
Nel Dos Santos
This work is licensed under a Creative Commons Attribution 4.0 International License.
