Mentantu nun fine esta llácara, seguirán cellebrándose aconceyamientos que la denuncien.
Mañana a les siete la tardi, comu ca caberu miércoles de mes, delles organizaciones aconceyarán delantre l’edificiu de La Gota Llechi, en Xixón pa denunciar les consecuencies del patriarcáu y de la violencia contra les muyeres. Una pancarta contabilizará’l númberu d’asesinaes por ser muyeres en tol estáu, una cifra que nun apara de medrar faciendo rescamplar la inutilidá de les midíes tomaes fasta’l momentu pa finar con esti problema. Los convocanes son la Plataforma Stop Violencies, qu’acomuña a les organizaciones Andecha Ástur, Anticapitalistes, Amamantar, Asociación de Pensionistes de Xixón, Feminismu en Llucha del CSI, la plataforma del serviciu d’ayuda a domiciliu -SAD-, Podemos y Verdes-Equo.
Darréu la intervención, qu’esti mes correrá a cargu de Carme Pérez, d’Andecha Astur, lleeránse los nomes de toes les muyeres asesinaes no que va d’añu, una cifra que s’avera al mediu centenar, cola esperanza de que dalgún día aporte’l mes en que nun se tea d’allargar la llista con nuevos nomes. Mentantu nun fine esta llácara, seguirán cellebrándose aconceyamientos que la denuncien.
Susana Sela
This work is licensed under a Creative Commons Attribution 4.0 International License.
