Llucía F. Marqués
Que daquién me desplique, por favor, de qué va esta chiflaura d’estrar Asturies de muñequinos infantiles, porque nun m’entero
Val que puedo ser pesada col tema pero tengo que falar d’ello. Lleo na prensa “Pitufo Gruñón ya tien compañera en Siero: Pitufa Karateca dará la bienvenida en La Pola” y non, nun tamos en Bruseles, llar de Pierre Culliford, autor de los pitufos, que de xuro merecería esta figura a la entrada de la so ciudá natal. Falamos de La Pola Siero, onde igual procedía más, nun se, un güevu pintu a la entrada, si queremos ponenos folclórico-gayasperos.
¿Una pitufa? ¿Qué tien de sierense una pitufina, daquién pue desplicámelo? Los conceyos asturianos entraron nuna espiral d’haber quien fae la chorrada más grande pa salir en prensa y al paecer tan de moda los pitufos, porque van dos.
Hai tiempu que lo alvertíemos, Asturies entamaba a ser un muséu de si mesma. Muséu de la minería y la industria, del ferrocarril, de la siderurxa, del gallu montés… ¿la escuela rural? Un muséu; ¿los bolos? Un muséu; ¿la gaita? Un muséu. Tolo que fore decayendo, en llugar de puxar por ello, enterróse direutamente nun muséu; munchos d’estos museos remanecen presllaos bona parte l’añu, el resto, cuasi vacíos.
D’ehí pasemos rapidamente per una fase de grandonismu: les lletrones, cola toponimia siempres enquivocada, y les coses (navaya, gaita, pandereta…) más grandes del mundiu, que polo menos tienen el so aquel de tar venceyaos al llugar onde se ponen. Too seya por apurrir un escenariu pa la semeya, como si la Sierra’l Sueve o la mar nun foren bastante bon fondu pa escolingar la foto n’instagram.
Agora pasamos a decorar Asturies comu si fore una guardería infantil o un parque d’atracciones. Una pitufina en La Pola Sieru, un pitufu (repunante, eso si) en Llugones, un “Danonino” en Salas, un trenín de xuguete en Somiéu ¿Onde queden en too esto los asturianos? Tres de la barra, de feriantes o llimpiando los restos de la marabunta en finando’l branu, que con lluvia el paradisu mola menos.
This work is licensed under a Creative Commons Attribution 4.0 International License.
