La suma d’argumentos en contra’l proyectu de la mina d’oru nun frenó a La Conseyería de Ciencia Industria y Emplegu d’Asturies, qu’espublizó apocayá nel BOPA la continuidá del procedimientu para poner en marcha la mina d’oru en terrenes de Salave

La Conseyería de Ciencia Industria y Emplegu d’Asturies permite que siga’l proyectu de la esplotación soterraña del xacimientu Salave en Tapia como Proyectu d’Interés Estratéxicu. Faelo pesi a ser disconforme cola ordenación territorial y urbanístico a valir , pesi a que la Conseyería de Transición Ecolóxica, Industria y Desendolcu Económicu del Principáu resolvió un informe ambiental negativu, pesi a que’l proyectu de la empresa reconoz que nun se trata d’un proyectu d’interés estratéxicu, cuidao que l’actividá minera va tener una duración de diez años, ensin continuidá de  los posibles puestos de trabayu na mesma, pesi a los arramaos tóxicos, a les escombreres, a estrozar del paisaxe, a les consecuencies para otros sectores -agricultura, ganadería, turismu, pesca- pero percima de too, perriba la voluntá de los tapiegos, que lleven años lluchando contra’l proyectu. 

La Coordinadora Ecoloxista de Asturies, presente nel refugu d’estes mines dende’l primer momentu, resume les consecuencies ambientales del so posible desendolcu:

-L’arramáu de toles agües del procesu realizaránse vía emisariu submarín, a escasos 300 m de la mariña col consiguiente impactu. La redolada costera d’influencia asitiase ente 700 y 300 m de distancia.

-Nun se tien en cuenta la proporción de sustances tóxiques emplegaes nos tratamientos, particularmente les d’orixe bencénicu, que van finar nos depósitos y escombreres.

-La implantación d’escombreres sobro la ribera del calce qu’escurre nel llende suroeste trai ineludiblemente’l derrame del material depositáu nella.

-La topografía de la redolada nun va permitir que’l sistema de drenaxe previstu seya quien a recoyer les agües pluviales.

-El consumu d’agua añal va ser de 0,5 Hm3, prácticamente la metá del consumu d’agua suministráu por CADASA (0,95 Hm3 según la Memoria de 2019) a los conceyos costeros occidentales (dende Navia a A Veiga).

-Nun se tien en cuenta la sismicidad de la zona, que nun ta exenta de riesgu.

-Les escombreres, por mor del volume de masa estrayíu, tendrán de ser permanentes.

Dende la CEA siguen esperando qu’estos argumentos, presentaos en forma d’alegaciones, finen por frenar el proyeutu. 

Nel Dos Santos