L’asturianismu rebélase frente al rellatu oficial que pretende blanquiar a Antonio Trevín tres la so muerte y fae repasu de les polítiques del ex-presidente, ex-alcalde y ex delegáu de gobiernu
Mientres la voz oficial fala d’un políticu de primera, la memoria del pueblu saca a la lluz el papel real d’Antonio Trevín nel so llargu pasu pela política asturiana “una secuencia de traiciones conscientes al interés colleutivu d’Asturies”, resumen dende Andecha Astur. Urbanismu depredador, especulación y turismu descontroláu en Llanes, intermediariu docil con Madrid comu presidente, destacáu pol so silenciu énte’l desaniciu económicu d’Asturies, pioneru na criminalización de la protesta social, agresión al movimientu obreru y represión llingüística comu Delegáu de gobiernu, el so pasu pela política asturiana ta marcáu pol permitir y facilitar el desaniciu de la cadarma económica’l país, la desindustrialización d’Asturies y l’espoliu medioambiental.
Asina lo recueye Andecha Astur nun durísimu artículu nel que documenta con precisión ca una de les traiciones d’esti políticu a Asturies. “La muerte d’Antonio Trevín nun borra la so trayeutoria política nin lu exonera de les sos responsabilidaes” y asina lo recuerden los asturianos nos sos comentarios en redes. “En morriendo, ye tol mundiu güenu, nel oriente tovía nun sabemos como fui tola corrupción l’autovia en Llanes” menciona en X l’usuariu ‘Arfueyu’, remembrando la llaceriosa xestión del fináu comu alcalde del conceyu, un pasu pela alcaldía nel que non solo rescampló la corrupción sinón que s’afitaron los pegoyos pa un turismu descontroláu ya un urbanismu llaceriosu, afitando de pasu una rede clientelar basada nel amiguismu pocu menos que mafiosa. Los sos planes urbanísticos fueron anulaos pol Tribunal Superior de Xusticia por inregularidaes manifiestes gracies a la denuncia d’Andecha Astur. “¿El del pelotazu en Llanes? Tanta gloria tope comu paz dexa” menciona al respeutu otru usuariu.
Falando del tema del asturianu, dende l’Asociación en defensa l’Asturianu N’Ast faen rescamplar el so envís represor y esplicitamente contrariu a la oficialidá, remembrando la so famosa frase “Oficialidá nun va haber, pero tranquilos, perres va haber pa tol mundu” cola qu’afitaba nuevamente ya ensin vergoña el so sistema clientelarista.
Los comentarios dende UHP Asturies son entá más duros “Nun vamos llorar por un enemigu de los trabayadores asturianos, que caún llore a los de so” escriben, pidiendo memoria hestórica y remembrando que “Nun foi un bon presidente p’Asturies y cuando foi Delegáu de Gobiernu foi un carceleru de militantes diversos, toos ellos dientro’l campu popular”.
Llucía F. Marqués
This work is licensed under a Creative Commons Attribution 4.0 International License.
