Fernando Alberto Tirador Martínez, alcalde d’Illas por IU, torna a la carga na so asturifobia declarada, dando como rempuesta la refuga a un escritu presentáu n’asturianu pola asociación  Horru on line, que denuncia la situación de los horros, paneres ya cabazos en toa Asturies “Atendido que el asturiano no es cooficial de esta autonomía” faciendo una interpretación personal y restrictiva de La Llei 1/1998, de 23 de marzu, d’usu y promoción del bable asturianu y de la xeografía del conceyu, al afirmar que “Solo es resulta de aplicación al Principado de Asturias” (albidramos que pa elli Illas pertenez a Murcia, onde ta nidio que la llei nun ye d’aplicación).

Nun ye la primer vuelta qu‘esti conceyu tien problemes por esta mesma xida, siendo ello que’n xineru d’esti mesmu añu recibió un apercibimientu per parte’l Conseyu de Transparencia, qu’instó al Conceyu d’Illas a retrucar una solicitú escrita n’asturianu.

Hai que remembrar que la Llei d’Usu y Promoción ye una llei vixente que regula los drechos de los ciudadanos a utilizar l’asturianu y l’obligación de l’alministración a faer qu’estos drechos se cumplan. Foi aprobada pola Xunta Xeneral del Principáu d’Asturies y espublizada el 23 de marzu de 1998. Nel so Capítulu II, artículu cuartu, recuéyese’l drechu a utilizar l’asturianu en comunicación oral o escrita cola alministración pública. Esta llei ta reforciada poles nueves direutives aprebaes esti añu, que si bien allonxen muncho de la oficialidá, dexen bien nidio la obligación de les alministraciones asturianes -toes elles- de facilitar les comunicaciones n’asturianu.

Llucía F. Marqués