Benigno Pérez, recién estrenáu presidente del Conseyu Regulador de la DOP Quesu Cabrales, presentó nel Llagar de Colloto la LIII edición del Certame del Quesu Cabrales
Una de les grandes cites del certame ye la subasta de la pieza ganadora. L’añu pasáu, Iván Suárez, propietariu d’El Llagar de Colloto, pagó 36.000 euros pol quesu, tando a piques de recibir por ello un reconocimientu Guiness, y por eso esi establecimientu, que lleva cinco años siguios llevándose la puya, foi’l llugar escoyíu pa dar arranque a esta edición. “Ca añu celebramos equí l’actu nel restaurante que se lleva la subasta”, recordó David Fernández-Prada, responsable de Gustatio, empresa que coordina l’eventu.
Beatriz Suárez, del Llagar de Colloto, nun ocultó la importancia que tien pa ellos llevar un quesu tan esclusivu. “Los nuesos clientes valoren munchu tener el quesu más caro del mundu, asina que vamos siguir apostando por la subasta”, esplicó. En total, esti establecimientu lleva gastaos 117.800 euros nestes puyes, aumentando’l preciu ca añu.
Dende’l Gobiernu del Principáu, la directora xeneral de Desarrollu Rural y Industries Agraries, Begoña López, destacó’l valor simbólicu d’esta cita. “Esti certame amuesa l’ADN asturianu, detrás hai un gran trabayu de queseríes y ganaderos, y la calidá medra cada añu”, dixo, reafirmando’l sofitu institucional.
José Sánchez, alcalde de Cabrales, amosóse tamién orgullosu de tener, otru añu más, “el meyor quesu del mundu” nel so conceyu. La quesería Ángel Díaz Herrero, de Tielve, que llogró esti galardón na última edición, va volver presentase col enfotu de repetir llogru, según confirmó Encarni Herrero nel actu d’ayeri.
El próximu 31 d’agostu va tener llugar la esperada cita “Entá nun sabemos cuántos participantes habrá, pero confiamos en que sedrá un gran añu”, apuntó Benigno Pérez, que recordó que la última puya quedó en 36.000 euros y quiciabes supere los 40.000 na próxima edición. Esti ganaderu, que recién s’estrena comu presidente de la DOP, apuesta pola collaboración pente ganaderos y queseros pa que la DOP Quesu Cabrales siga xorreciendo.
Llucía F. Marqués
This work is licensed under a Creative Commons Attribution 4.0 International License.
