AAVV Gigia Cimavilla

Pioneros na llucha contra’l turismu masivu y la xentrificación, Cimavilla cientró campañes comu ‘Macillavi pa los Yospla’, d’Andecha Astur, apelando al drechu de que’l barriu seya pa quien lu mora.

Mañana a les siete la tardi, delantre la Casa El Chinu, convócase una concentración pa reclamar el drechu de Cimavilla a ser un barriu onde vivir. Cimavilla esiste, Cimavilla nun se preslla, Cimavilla nun ye un escaparate nin un parque temáticu. Pa cuntar el conflictu, escoyemos les acertaes pallabres de la editorial “Somos Playos”, que con coña marinera desplica l’asuntu meyor que naide

“El barriu de Cimavilla ye como un parque d’atracciones, equí vienes con dos duros y faes lo que te de los coyones, mexes vomites y cancies y nun ves un policía, ye una reserva comanche que nun tien caballería, somos los Sabrosones de Cimavilla”

Asina sonaba nes tables del Teatru Xovellanos la canción que con socarronería al más puru estilu playu canciaben nel concursu charangues va cuasi 20 años la estinguía charanga del barriu altu. 

Una lletra que, pesi al tiempu, podría ser un auténticu hit del momentu y non precisamente por ponese de moda, sinon porque nun camudó res. Meyor dicho, na ameyoró, porque si hebio cambeos foi pa pior. 

Cimavilla agora nun ye solo escenariu pal arruelu descontroláu, el botellón y la borrachera. El barriu topó un nuevu padrocinador, na más y na menos que la propia Ca Conceyu de Xixón. Quien debiere trabayar pa conciliar y minimizar les molesties carecies tol añu torna la piqueña península xixonesa en Divertia-landia. 

A los ya tradicionales espectáculos de despidies de solter@s, botellón a vista de dron, la baxada infernal de la Cuesta el Cholo, nueche de fueos, festival aéreu internacional, sidre, Arcu Atlánticu … súmase’l Gran Paséu Gastro. 

Entendemos que pudiere ser porque nun hubiere chigres abondos, nun vaiga ser que quede llibre mediu metru cuadráu pa que puedan caminar y salir del so barriu la xente.

Cimavilla, barriu queríu por tola xente de la ciudá, por toles persones que lu visiten, emponderáu pola so hestoria, tamién pola so forma de vida, tan deseyáu poles instituciones, con tantos proyeutos, tantes idegues, tantes inversiones, tanto, tanto…

Neto que la Lola Flores, en plenu desesperu, a Cimavilla namás-y queda glayar ¡Si me queréis, divos!

This work is licensed under a Creative Commons Attribution 4.0 International License.