La Conseyería de Movilidá, Mediu Ambiente y Xestión d’Emerxencies del Principáu autoriza l’ampliación de la planta de tratamientu  de borrafes del polígonu de la Curiscada en Tinéu p’acoyer más de 80.000 tonelaes de residuos de toa España

Con esta ampliación van ser 80.300 tonelaes  al añu les que van xestionase na instalación, lo que supon una ampliación de 54.300 tonelaes sobro l’actual capacidá. L’orixe d’eses borrafes orgániques va ser toa España, de los que 22.000 van ser purinos de ganaderíes.

Namás colos purinos y teniendo en cuenta la xestión que d’ellos se fixo na planta hasta’l momentu yá tenemos un importante problema. El componente más contaminante d’estes borrafes ganaderes, el nitróxenu, nun s’esanicia naturalmente, siendo necesariu una xestión bien controlada de los mesmos, daqué qu’agora mesmu, con volumes muncho menores, yá nun se ta faciendo, según denuncia va años la Coordinadora Ecoloxista y los ganaderos afectaos.

Los vecinos y empreses cercanes quéxense tamién de que nun se tomen midíes efectives pàra amenorgar los golores de la planta, tantu nel procesu de carga y descarga como los gases xeneraos nel procesu.

Amás, esta autorización permite-yos vertir directamente al campu  la fracción líquida del dixeríu y la resultancia de la xestión de folles de depuradora urbana ya industriales a campu, que la so concentración yá ta teniendo impactos negativos tantu nel suelu como nel sosuelu.

Susana Sela