Llucía F. Marqués
Asturies va camín de ser un parque temáticu de si mesma, ún con mui pocu espaciu pa que los asturianos y asturianes faigan la so vida con normalidá
Por si daquién dudaba que tan faciendo d’Asturies un parque temáticu, y por si los pitufos xigantes y dinos danoninos nun mos daben una pista, esti branu tenemos nel conceyu d’Ayer un trenín turísticu.
Non, nun toi diciendo que, aunque seya pa favorecer el turismu, vaiga furrular decentemente’l tresporte públicu, con trenes funcionales que lleguen a la hora ensin averíes, qu’eso polo menos tendría dalguna ventaxa. Falamos d’un trenín de feria, neto que los de los parques temáticos o Mercaplana, que va percorrer cais y caleyes ayeranes pol módicu preciu de dos euros por persona. Qué guapo.
Lo del turismu de calidá, que dexe perres, que contribuya con un impuestu turísticu al desendolcu de los conceyos destín, que ponga’n valor cuestiones identitaries y respete la cultura, les tradiciones y les formes de vida tradicionales d’Asturies, respetuosu pa coles xentes y los paisaxes, socialmente rentable… dexámoslo pa prau, que na prensa cantidá ye meyor que calidá y que los beneficios vaigan a parar a los bolsos de cuatro empresarios, mientres pa los que vivimos n’Asturies queden los trabayos precarios, los servicios saturaos y los pisapraos.
Por agora los asturianos nun tenemos que dir antroxaos peles cais pa saludar a los visitantes, tiempu al tiempu.
This work is licensed under a Creative Commons Attribution 4.0 International License.
