Nel primer semestre de 2025 foron 724 les persones que morrieron ensin recibir la prestación a la que tenien drechu pol so gráu de dependencia, de los que la mayoría, 685, nun vieron siquiera’l so casu valoráu y otres 39 nun llegaron a recibir l’aida que teníen reconocía.
L’Observatoriu de la Dependencia espubliza estos datos, llamando l’atención sobre’l fechu que’l Ministeriu de Drechos Sociales ‘escaeció’ dar esa información nel so caberu informe del Panel de Dependencia, correspondiente a la primer metá del añu en cursu. La cifra, de 724 persones que morrieron anantes de recibir la prestación a la que teníen drechu, implica que dos asturianos o asturianes al día finaren mientres esperaben que’l gobiernu cumpliere cola so obligación.
L’Observatoriu de la dependencia fae rescamplar tamién que los optimistes datos apurrios pol Ministeriu sobre la llista d’espera ‘namás contempla les solicitues que lleven más de seis meses ensin resolver, ello ye, les que tan fuera del plazu marcáu pola llei. Nun se trata d’una llista d’espera, sinon d’una llista d’incumplimientu de llei’. Les persones en llista d’espera superen por muncho les reconocies pol Ministeriu, averándose a les 300.000 nel conxuntu l’estáu.
Pesi a les altísimes cifres de persones que tan esperando plaza residencial porque les sos families nun tienen manera d’atendeles en casa, el númberu de places disponibles non solo nun medró, sinón qu’amenorgó nesti periodu. Les persones que tienen reconocíu esi drechu pero que siguen esperando sitiu reciben, nel meyor de los casos, un sofitu de menos de dos hores semanales d’atención a domiciliu o una aida pa curiau por parte les sos families de 264 euros al mes.
El 56,5% de les persones atendies nos sos domicilios nun cuenten col serviciu de Teleasistencia, siendo que’l Plan de Choque del añu 2021 afitó esti serviciu como un drechu de toda persona en situación de dependencia que viviere en so casa.
En total, son munches lleis les que s’incumplen, munches persones de mui alta vulnerabilidá que nun reciben l’atención a la que tienen drechu y pel camín, munches families que nun tienen comu atender a les sos persones dependientes y munches perres que s’aforren dende’l gobiernu dexándolos morrer ensin concedeyos los sos drechos.
Llucía F. Marqués
This work is licensed under a Creative Commons Attribution 4.0 International License.
