La Confederación Hidrográfica del Cantábricu nun sanciona al Conceyu de Xixón polos arramaos de toa clase de borrafes al rio Pilón al so pasu pol polígonu industrial de Mora Garay
A pesar de que la Confederación Hidrográficala del Cantábricu conoz la esistencia d’una gran cantidá de borrafes sólides – plásticos, estintores, palés, sielles d’oficina, enseres, bidones, ventanes, ordenadores, electrodomésticos, etc- en la marxe derecha y sobro el mesmu calce del ríu Pilón, que degraden la calidá de les sos agües, nin esi organismu nin les alministraciones responsables -esto ye, el Conceyu de Xixon y el Principáu- preven dengún tipu d’actuación pa evitar esta contaminación, perceptible a güeyu.
La paraxa abandonada convirtióse nun vertideru incontroláu constituyíu por depósitos diversos efectuaos de manera clandestina, desconociéndose los posibles y numberosos autores de los mesmos.
Tou esti volume de contaminación acaba na mar y les corrientes llévenlo al restu de sableres de Xixón y a les de la mariña de la nala oriental col consiguiente impactu nel mediu marín.
Tou ello a pesar de qu’oficialmente esti pasáu xunu la Confederación Hidrográfica del Cantábricu realizó los trabayos de caltenimientu nel regueru Pilón nel marcu del Conveniu pal desenvolvimientu d’actuaciones de caltenimientu+ de calces nel términu municipal de Xixón.
La Coordinadora Ecoloxista d’Asturies denuncia la degradación de la nuesa redolada natural por culpa de la neglixencia y la tolerancia de les autoridaes responsables de curialo y de xixilar la so estabilidá. “Una actitú ca vuelta más indolente y suicida que paez optar por nun tomar les midíes afayaices pa desaniciar la contaminación tres años y más años d’alvertencies”.
Susana Sela
This work is licensed under a Creative Commons Attribution 4.0 International License.
