Los analises demuestren la presencia de sustances altamente contaminantes y la Confederación Hidrográfica deniega’l permisu avalau pol Principáu p’almacenar materiales contaminantes pela redolada de la Mina de fluorita Emilio en Colunga, esplotada por Minerales y Productos Derivaos, S.A. (MINERSA).

Dende va tiempu vienen realizándose arramaos d’achique de mina, denunciaos reiteradamente pola Coordinadora Ecoloxista de Asturies, lo que llevó a la realización d’analís nes agües del Ríu Espasa.

Les analítiques apocayá realizaes detectaron na cuenca del Ríu Espasa -que desagua na sablera del mesmu nome- la presencia de parámetros contaminantes non incluyíos na autorización, concretamente; cobre, níquel, cinc y seleniu, toes elles sustances peligroses incluyíes nos Anexos IV y V del Real Decreto 817/2015 por afectar a la calidá ambiental.

Esta mina, operativa dende 1985, ye una de les principales abastecedores d’espatu-flúor de la Península y ta allugada en Loreñe, conceyu de Colunga. Nos regueros nos que s’arramen les agües residuales apréciase una elevada sedimentación de sólidos en suspensión y agora sábese que tamién sustances peligroses.

Nin la empresa nin la Confederación tomaren hasta’l momentu midíes pa evitar estos arramaos mientres les décades que lleva n’esplotación, pesi a les denuncies de la Coordinadora Ecoloxista sobre’l volume d’arramaos y elevada sedimentación na cuenca’l Ríu Espasa. De magar estes denuncies fexéronse los análises y pudo comprobase que los niveles de los tóxicos yeren enforma mas elevaos que los que reconocía la empresa de control que contrataba la empresa, daqué qu’aviva les duldes sobre la independencia de los estudios de pagu.

El Gobiernu d’Asturies avaló primeramente la peligrosa solución propuesta pola empresa, almacenar les escorrentíes interiores contaminaes coles  nuna caldera d’una zona yá  esplotada nel interior de Mina Emilio, alternativa que por fin se refuga ante l’evidente riesgu que supondría xenerar un gran banzáu contamináu soterrañu.

La única solución vidable ye, pa la CEA, que la instalación d’una depuradora que trate estes agües contaminaes antes de vertiles al ríu Espasa.

Susana Sela

This work is licensed under a Creative Commons Attribution 4.0 International License.