La concentración mensual de denuncia de les violencies machistes foi nesta ocasión más sentida si cabe, al contabilizar pente los 12 asesinatos del caberu mes a una asturiana alcontrada muerta a poca distancia del llugar onde se desendolcó l’aconceyamientu

La refuga contra les violencies machistes tornó a aconceyar a alrodiu d’un cientu de persones al pie de la Gota Llechi, con una pancarta de númberos crecientes qu’algama ya la tarrecible cifra de 41, depués d’un xunu terroríficu con 12 víctimes; la cabera, en Xixón va tres díes.

Na llectura del manifiestu púnxose l’acentu na violencia vicaria, la más cruel por afeutar a menores y de la que van dos casos esti añu, insistióse na importancia de la educación na fin d’esta llácara y apuntóse a la inutilidá de les midíes xudiciales aplicaes “La xusticia sigue fallando, les midíes son tardíes, les custodies caltiénense ya’l riesgu persiste” apuntó la vocera de Podemos, encargada nesta ocasión de lleer el manifiestu consensuáu pente les organizaciones convocantes, Andecha Ástur, Anticapitalistes, Amamantar, l’Asociación de Pensionistes de Xixón, l’Asociación Ecofeminista Petra Kelly d’Asturies, el Colectivu de Trabayadores, Feminismu en Llucha del CSI, la plataforma del serviciu d’ayuda a domiciliu -SAD-, Podemos y Verdes-Equo 

Tres de la intervención tuvo llugar un momentu d’intensa emoción nel que se lleeron los nomes de toles asesinaes coles sos edaes, que van de los pocos meses  a los 87 de la mayor, amosando que la violencia sobre les muyeres nun tien edá y afeuta a toes.

Que nun s’escaezan lo sos nomes.

Susana Sela

This work is licensed under a Creative Commons Attribution 4.0 International License.