La primer representación cartográfica na qu’apaez Xixón ye nel conocíau como ‘l’Atles del Rei Planeta’, data de 1624, tuvo trés sieglos sumíu y ta retuláu n’asturianu
L’atles artísticu más importante d’Europa ye una colección de mapes encargada en 1622 pol rei Felipe IV, conocíu como ‘el Rei Planeta’ pol tamañu del so imperiu nel sieglu XVII. L’atles titúlase oficialmente ‘Descripción d’España y de les mariñes y puertos de los sos reinos’ y foi encargada, non por amor a la conocencia del monarca, sinón para tener el mayor detalle de toles places fuertes y villes costeres susceptibles de ser atacaes.
Ellaboráu de callao pol cosmógrafu mayor del reinu, Juan Bautista Lavanha, y el cartógrafu Pedro Teixeira, esti documentu tuvo trés sieglos sumíu, hasta que foi afayáu na Biblioteca Imperial de Viena polos xeógrafos Fernando Maríes y Felipe Pereda afayar, nel añu 2002.
La so ellaboración riquió la visita per parte de Bautista y Teixeira de toles ciudaes rexistraes, d’onde se deduz que la rotulación col nome de ‘Xixón’ correspuende al usu común d’esti topónimu na dómina.
Sicasí, cuando la prensa oficial recueye a día d’ayeri la noticia faelo mencionando en tou momentu el topónimu españolizáu ‘Gijón’, ignorando la imaxen qu’ellos mismos asoleyen y demostrando que l’asturfobia ye más fuerte que cualisquier evidencia hestórica.
Susana Sela
This work is licensed under a Creative Commons Attribution 4.0 International License.
