CODOPA y EAPN Asturies presenten la campaña ‘Yes Asturies’, que venceya la identidá asturiana con mensaxes de xusticia social y global
Apostar polo colectivo, dar mensaxes en positivu y convidar a la participación ciudadana son dalgunos de los oxetivos que s’escuerren con esta iniciativa social de la Coordinadora de ONGD del Principáu d’Asturies (CODOPA) y la Rede Europea de Llucha contra la Probeza y l’Esclusión Social (EAPN-Asturies), una campaña de comunicación multiformatu na que se venceya la identidá asturiana con mensaxes de xusticia social y global.
Estes redes acomuñen alrodiu d’un centenar d’entidaes con see n’Asturies que testigos de cómo’l mundu ta enrevesándose: la medría del númberu de conflictos armaos, les crisis climátiques, l’aumentu de les desigualdaes y la perda de drechos, son dalgunes de les esmoliciones más alarmantes al poner diariamente en peligru la vida de millones de persones.
Esti escenariu de multicrisis consolídase como’l contestu aparente pa qu’abonden los discursos d’odiu, y la esmolición compartida pol xorrecimientu d’estes narratives n’Asturies ye lo que fai que CODOPA y EAPN Asturies promuevan la campaña Yes Asturies, “creando un espaciu para texer comunidá en redol a tou aquello que nos xune”.
El filu conductor ye la identidá asturiana, “una celebración de lo que nos fai sentir arguyoses ensin perder el nuesu ADN reivindicativu: la solidaridá, l’amor pol territoriu, l’inconformismu, la gastronomía, la diversidá cultural… La puerta ta abierta a toles persones que sentimos que’l mundu puede ser un llugar meyor y que, dende Asturies, tenemos enforma qu’apurrir”.
Yes Pegollu va ser la primer actividá presencial d’esta campaña y que va tener llugar el próximu domingu 29 de xunu en Kuivi Almacenes.
Susana Sela
This work is licensed under a Creative Commons Attribution 4.0 International License.
