De bien antiguo ye vezu allugar monumentos y escultures pa facer alcordanza de personaxes o acontecimientos que se consideren fitos importantes nel camín históricu d’una comunidá.
Exemplos hai a esgaya per tol mundu. Vamos recorrer tres llugares namás pa ilustralo.
Entamamos el caleyar nuna islla del Mediterráneu. Ellí, en Mallorca, alcontramos una escultura dedicada a los flonderos baleares, consideraos de los primeros pobladores d’estos llugares y qu’algamaren sonadía nos tiempos de la edá antigua cuando cartaxineses y romanos andaben a la tema pa dominar la contorna, reclutándolos.
Dempués podemos pegar un bon reblagu nel mapa y nel tiempu y algamar les tierres norteñes del atlánticu. Llegamos a Escocia y atopamos na cuguruta del monte Abbey Craig el monumentu cola escultura de William Wallace, el héroe nacional escocés del sieglu XIII, que lluchare contra’l dominiu d’aquelles tierres polos ingleses.
Y qué meyor manera pa acabar esti percorríu que tornar mapa abaxo y d’otra galmiada aportar a casa, n’Asturies. Equí podemos contemplar inmortalizaos a Otavio Augusto y a Isabel la Católica na mesma ciudá onde tan los restos d’ún de los castros más nomaos del norte peninsular, el de los Cilúrnigos, y a bien poca distancia del conceyu onde s’alluguen les ruines del llexendariu Castiellu de Gauzón, onde Alfonso III mandó iguá la cruz que llevamos na nuestra bandera.
El casu ye qu’hai vegaes que, reparando en coses que nos pudieren paecer poco relevanates, puen ayudanos a pescanciar aspeutos de la nuestra idiosincrasia y tamién ayudar a entender los finxos identitarios de los monxures que remanen, dende allá de los tiempos, los destinos d’esta tierra de nuestro.
This work is licensed under a Creative Commons Attribution 4.0 International License.
