Fai falta daqué tan cenciello como una manguera normal pa que les vaques nun muerran de sede n’Amuesa, pero’l Principáu prefier obligar a los ganaderos a dir a pastos privaos, arriesgando amás les sos ayudes
Anguañu son namás trés los ganaderso que xuben ganáu a la mayada d’Amuesa, nos Picos d’Europa, pesi a que tienen drechu a ello unos dolce o trelce; el problema ye que nun hai agua, la única llamarga natural foi ensugando los caberos años -en parte pol cambéu climáticu, pero tamién por falta de caltenimientu- y los responsables del Parque Nacional de Picos nun cumplen la so promesa de llevar agua d’H.ou de l’Agua a la mayada d’Amuesa.
Ello ye que va cuatro años si que llevaron un mangón con esa intención, pero cola zafallada avezada de les alministraciones asturianes, ésta ye demasiáu gruesa y pocu flesible, lo que torga la so instalación: los sos cachos tan regaos pel parque nacional de magar entós, ensin que naide los llimpie nin sustituya.
Los ganaderos alverten de que si non se soluciona darréu’l problema van tener que baxar el ganáu al valle, lo más tarde l’un de de xunetu. La solución que-yos queda ye llevar el ganáu a la pradería de la H.elguera, en Bulnes… privada, polo que nun-yos sirviría de nada pagar la llicencia municipal pa llevar el so ganáu a montes públicos. Pa ellos esto tien una doble implicación, nun se trata solo d’abandonar les camperes de branu y tener que pagar pa llevar a pacer el so ganáu, sinón que si nun caltienen los animales nos terrenes de la Mayada de Amuesa, en Puertu Maín (Bulnes) siquier mientres trés meses podríen perder les ayudes de la PAC.
Llucía F. Marqués
This work is licensed under a Creative Commons Attribution 4.0 International License.
