Pesi a que les necesidaes del coleutivu foron señalaes demientres la cabera fuelga docente y l’atención a les persones con NEE yera una de les demandes, l’atención al coleutivu nun se tuvo en cuenta nos alcuerdos firmaos polos sindicatos cola alministración del Principáu

Dende l’Asociación polos Drechos de les Persones con Autismu (ADPA) denuncien que la reciella y mocedá con esti síndrome y otres condiciones del neurodesendolcu “continuen acudiendo a cientros que nun cuenten colos recursos humanos nin materiales necesarios p’atendelos afayaizamente”. Esta situación, remarquen, ta dexando fondes güelgues emocionales, educatives y sociales tanto nos escolinos como nes sos families.   

Una realidá urxente que, anque foi señalada públicamente durante la fuelga docente, qu’incluyía pente les sos demandes una meyor atención a los escolinos con NEE (Necesidaes Educatives Específiques) quedó fuera l’alcuerdu que los sindicatos roblaron cola conseyería, ensin resolvese nin garantizase dengún avance dende l’alministración educativa. 

Desde ADPA van facer por visibilizar esti problema a traviés d’una serie de testimonios directos de cinco families asturianas, ente elles dos que ya acudieron a los tribunales en busca de xusticia ante la desprotección que viven los sos fios y fies nel sistema educativu. La idega ye facer llegar a la población la situación na que s’alcuentren, faciendo por sensibilizar a la opinión pública y presionar a les alministraciones pa que se tomen les necesaries midíes. 

Nel Dos Santos

This work is licensed under a Creative Commons Attribution 4.0 International License.