Lo mínimo que s’esixe, dende un compromisu de izquierdes mínimamente coherente, ye que quien ostente responsabilidaes de gobiernu seya capaz de caltener una clara separación ente les sos creencies personales y la so acción política.

Sicasí, el presidente d’Asturies vien de traspasar esa llende con unes declaraciones tan desacertaes como impropias del cargu qu’ostenta.

Nuna xornada entamada pola parroquia de Santa Olaya de Xixón, baxo’l títulu “La interacción fe-cultura nel actual procesu de humanización”, Barbón pronunció una ponencia titulada “Fe y praxis cristiana nel compromisu sociopolíticu”, na que aseguró, ensin rubor, que “si yes un bon cristianu, evitarás la corrupción” y que “tener fe ayúdame nos momentos más difíciles a nun dame”.

Nun tenemos claro si lo que precisa ye un cambeu de partíu o lleer a los clásicos del socialismu, porque los referentes ideolóxicos que manexa pa justificar la so actuación son más propios d’un seminarista que d’un dirixente socialista. Por si quier recuperar memoria histórica y política, recordámos-y dalgunes cites más acordies coles sigles que diz representar:

Karl Marx: “La relixón ye’l suspiru de la criatura oprimida, el corazón d’un mundu ensin corazón… ye l’opiu del pueblu.”

Friedrich Engels: “La relixón va esistir mentes l’humanidá seya incapaz d’entender les condiciones que la rodeen.”

Rosa Luxemburg: “La relixón, como tola ideoloxía reaccionaria, ye una forma de sometimientu. Nun hai socialismu real ensin lliberación espiritual.”

El socialismu nun puede camudar el mundu si sigue alimentando les mesmes cadenes morales y simbóliques que la clase dominante utilizó siempres pa someter a les clases populares. La relixón xustifica’l statu quo, bendiz la inxusticia, perpetúa’l patriarcáu y predica la resignación. ¿Cómo puede un socialista predicar la lliberación si al mesmu tiempu invoca una ideoloxía que manda calar, sufrir y esperar pola redención celestial?

Pero esti tipu de contradicciones ye habitual n’Adrián Barbón: el repúblicanu que un día se tapa col tricolor española y al siguiente besa la mano del rei ensin despeinase, pa finar sentándose nel escritoriu d’un Belarmino que refugaba ambes españes. El defensor de la oficialidá que nun utiliza la llingua asturiana más que de manera simbólica, incumpliendo incluso la llegalidá vixente nel tratamientu al asturianu na so propia alministración. El valedor de lo público que entrega la sanidá y la educación al sector privao. El socialista que, polo visto, necesita de la xixilancia d’un dios pa nun ser corruptu.

Al final, va resultar que tienen razón los que lu llamen el Beatu de Llaviana. O fray Barbón, si se prefier. Lo que nun ye, ye socialista.

This work is licensed under a Creative Commons Attribution 4.0 International License.