Llucía F. Marqués
Al presentar la moción sabiendo que nun tenía posibilidá de conseguir los votos suficientes Barbón fae una duple xugada: queda como’l mocín de la película ensin correr riesgos y permite a la prensa vender la idega d’una derrota de la oficialidá
Cuando pudo, nun quiso: n’anterior llexisllatura la oficialidá yera posible y los votos sumaben abondo pa sacala alantre, pero precisamente por eso, porque nun había una voluntá real de conceder a los asturianos esi drechu, nin se intentó. Agora quieren vendenos comu un ésitu el fechu de que se votare na Xunta una modificación del Estatutu que persabíen fracasada d’antemán. Ello tien dellos defeutos, tantu de fondu comu de forma.
Per un llau, los drechos nun se voten, reconócense; naide aceptaría que se votare por casu el drechu d’una determinada raza o sesu a votar o non, porque nun ye daqué qu’unos mandatarios tengan que querer o non, ye un drechu y preste o nun preste, tien de ser reconocíu, por definición.
Per otru, tamos falando de modificar un Estatutu que nin siquier foi aceptáu en so díe pol Pueblu Asturianu, siendo de los pocos territorios que nun tuvieron la oportunidá d’opinar al respectu de la norma que diba rexir el so díi ente díi, polo que nun tendría de modificase, tendría d’anulase y redactase un documentu consensuau polos asturianos.
Pa siguir, la ridiculez de llevar a la Xunta un tema tan importante como esti conociendo d’antemán que nun se va algamar la mayoría cualificada que les lleis españoles desixen, ye aceptar una derrota innecesaria.
La Oficialidá fracasó, esa ye la llectura xeneral, y de pasu dióse altavoz a los contrarios a la mesma. Eso si, Adrián Barbón vuelve salir na semeya comu’l defensor patriu ensin arriesgar na, otru de los golpes d’efeutu que tanto-y presten y que tantu necesita nesti momentu en que les sos conseyeries faen agues perdayuri.
This work is licensed under a Creative Commons Attribution 4.0 International License.
