L’Academia de la Llingua Asturiana ta acabante d’asoleyar la ufierta y la forma d’inscripción nos cursos de la Universidá Asturiana de Branu (UABRA), entamaos a comuña cola Universidá d’Uviéu.
Los cursos de branu de l’Academia son un espaciu d’enseñu llingüísticu y cultural intensivu. Nél, l’ALLA —en collaboración cola Universidá d’Uviéu y el Principáu— ufierta dellos cursos, xebraos en dos categoríes, per un llau Formación Llingüística Xeneral y pel otru los Cursos d’Afondamientu Cultural y Llingüísticu, d’una selmana de duración, dedicaos a materies perestremaes: mediu natural, patrimoniu, música, deporte, traducción…
El programa de formación llingüística xeneral, del 21 al 25 de xunetu, ye’l compuestu polos cursos Intensivu d’asturianu (nivel B2), empobinau a persones que, teniendo una conocencia elemental del idioma, quieran ameyorar el so nivel nos distintos planos comunicativo, ‘El teatru asturianu. Del testu a la escena’, y ‘La traducción al asturianu: teoría, práutica y nuevos retos sociales y teunolóxicos’.
Los tres cursos van facese n’horariu de mañana, nel Campus d’El Milán y tienen una duración de 25 h. Ta abiertu el procesu de prematrícula y matrícula.
Susana Sela
This work is licensed under a Creative Commons Attribution 4.0 International License.
