Alrodiu de mil persones manifestáronse ayeri contra la construcción d’un parque soterrañu que “significaría la destrucción del Campillín como lu conocemos”
La vecindá respuende con fuerza énte la intención del Conceyu d’Uviéu de construyir un parking soterrañu nos terrenes del Campillín. Alredor de mil persones aconceyáronse ayeri nesi parque al glayíu de “árboles si, parking non”.
Pa la construcción del mesmu sería necesariu baltar dellos de los árboles cuasi centenarios que faen d’El Campillín una zona verde apreciada por tola población, estropiando’l que se considera’l segundu pulmón verde de la ciudá. Amás, argumenten los vecinos, esti parking atraería más tráficu a la zona, revirtiendo l’enclín xeneral a peatonalizar y caltener llimpios los centros de les ciudaes en toa Europa. Los vecinos denuncien tamién que la obra solo tien un interés especulativu yá que se fadría a cuenta de suprimir places d’aparcamientu nes cais del barriu.
Tres esta multitudinaria manifestamientu yá se tán preparando nueves movilizaciones y acciones de protesta, en casu de que’l consistoriu decida siguir alantre col proyectu.
Esti casu, lo mesmo qu’el de los vecinos que coles sos protestes consiguieron salvar la muria de La Chalana, en Llaviana, evidencia que la protesta na cai ye la única opción que queda a los vecinos pa facer valir la so opinión no que cinca al llugar onde viven, daa la indefensión institucional y la escasez democrática que se carecen.
Susana Sela
This work is licensed under a Creative Commons Attribution 4.0 International License.
