Munchos docentes consideren que l’aceptáu polos sindicatos ye un preacuerdu de mínimos, alloñáu de les braeres vindicaciones del colectivu docente, que nun ufre garantíes abondes pa tresformar y fortalecer el sistema educativu públicu asturianu

Firma contra’l prealcuerdu en change.org

Los docenes dieron esti últimu mes un exemplu intachable de lo que ye la movilización llaboral, con xunidá, costancia y firmeza, cola fuelga xeneral, colos enzarros, coles dimisiones d’equipos directivos, coles manifestaciones multitudinaries… col apoyu de pas  mas d’alumnos, de comercios, etc, unes movilizaciones históriques que ficieron dimitir a una conseyera -nun hai relevu enagora- y obligando a Adrián Barbón a agachar la tiesta y claudicar, buscando una negociación que foi muncho más allá de lo qu’él pretendía nun entamu.

La primer estratexa -enfrentar profesores con pas y mas salió-yos al revés; la segunda, allargar les negociaciones pa presionar económicamenta a los fuelguistes, tamíen. Cola tercera, de suxerir que la inversión na docencia diba perxudicar a otros sectores públicos (sanidá por exemplu) diba camín de fracasar. Los sindicatos falaben de radicalizar protestes, con cortes de carreteres, barricaes y demás.

Pero pasó lo que pasa siempres: un alcuerdu de les organizaciones sindicales colos representantes del réxime clientelar, a espaldes al movimientu reivindicativu, que nun garantiza na de lo que llevó a la cai a decenes de miles de profesores. 

A la salida de la negociación la xente acoyó a gritos de “traidores” a los representantes sindicales y ya nes primeres hores entamaron a recibise baxes d’afiliaciones nos sindicatos. La rabia ya’l desconciertu ante lo paecía increible poques hores anantes, espardiéronse per dayures. Del “nin un pasu tras” de los trabayadores pasábase al “malapenes un pasiquín adelantre” de les cúpules sindicales. Migayes pa la pública, que sigue’l so procesu d’esmantelamientu, mientres se va a siguir pagando una ‘concertada’ que nun se precisa; por ciertu, ehí ta la respuesta a la falta de recursos que remanen como argumentu pa nun avanzar.  

Tres esta cabera negociación y la desconvocatoria de fuelga, el sentir compartíu per una gran parte del profesoráu asturianu ye de que’l sindicalismu de los comités vendió de nuevu a la clas trabayadora. Nun hai garanties de cumplimientu de cuestiones con plazos inasumibles, falten puntos perimportantes, sigue ensin haber planificación conocida pa la escuela pública asturiana, los docentes asturianos siguen cobrando perbaxo los del restu l’estáu, nun se contempla la eliminación de trámites burocráticos absurdos, la reducción real de les ratios nin de les hores llectives, nun se toca la PAU, nun se dota del personal nin los medios necesarios a la educación… lo qu’ufre Barbón y lo que los sindicatos aceuten ye pocu más qu’un montón de promeses nel aire, escuses vacíes y escurrimientos varios. 

This work is licensed under a Creative Commons Attribution 4.0 International License.