La xixonesa ‘Librería Momo’ ofiende a los asturfalantes al criticar en redes el gastu n’educación de cero a tres años
Pa la propietaria d’esti negociu ye ofensivo que los asturianos reciban les sos primeres clases sintiendo la so llingua materna. Da-y igual que tolos espertos insistan na importancia de la continuidá llingüística pente’l llar ya’l sistema educativu o qu’Asturies seya, xunto con África, la India y otres rexones con llingües minorizaes de les poques sociedaes del mundiu nel que l’enseñu se desendolca na llingua que nun ye la de so.
Da-y igual, pente otres coses, por que ye sevillana y comu tal sabe más d’Asturies que los asturianos; amás, en seis años que lleva viviendo en Xixón enxamás nun sintió falar ‘bable’. Bien, convidámosla a echar una güeyada a les sos valoraciones en Google, porque ellí tien dellos comentarios n’asturianu, igual-y val pa deprender daqué.
En cualisquier casu, el dispreciu d’esta sevillana nun ye más qu’un espeyu de lo que pasa n’Asturies: xente que vien d’afuera y quier decidir el futuru del nuesu país, que nun ye que reclamen los sos drechos, sinón que reclamen que los asturianos nun los tengamos. Españoles mui españoles de mentalidá imperialista qu’entá nun s’enteraron de que nun somos una colonia.
Lo qu’igual nun sabe esta muyer ye que los asturfalantes conformamos una parte mui importante de la comunidá llectora d’Asturies, polo que’l boicó a esa llibrería concreta ya ta manexándose comu manera de facer ver a esta señora el so tracamundiu.
Llucía F. Marqués
This work is licensed under a Creative Commons Attribution 4.0 International License.
