Diez persones llevaron a cabu una acción de protesta pacífica na Fábrica d’Armes de Trubia, torgando colos sos cuerpos encadenaos l’accesu al complexu comu denuncia contra la complicidá de les instituciones europees y del estáu español nel xenocidiu palestín
Portando pancartes con mensaxes como “El Xenocidiu entama equí” o “STOP Xenocidiu”, el grupu foi arropáu por más d’una ventena de ciudadanos que llegaron darréu convocaos al traviés de les redes sociales. Pretendíen esixir al gobiernu l’embargu y el fin del comerciu d’armes, nuna postura firme frente a la ofensiva israelina.
L’acción de protesta entamó a les 10 de la mañana y enllargóse una hora y media, mientres la cual la entrada y salida de vehículos tuvo bloquiada afectando a delles decenes de camiones. Dellos dispositivos de la Guardia Civil identificaron a les persones presentes.
El bloquéu remató cuando la Guardia Civil solicitó a unos trabayadores de la fábrica que cortaren les cadenes con una cizalla de la empresa, una operación criticada polos asistentes por contravenir al so xuiciu los protocolos de seguridá.

A finales d’abril el Centre Delàs d’Estudios pola Paz afirmaba nel so informe 72 Beneficiu colateral: Relaciones armamentísticas ente España ya Israel dende’l 7 d’ochobre de 2023, que les relaciones comerciales armamentístiques ente dambos países yeren más “abondosos y luctrativos” que nunca. Como recueyen nel documentu, “nunca antes la industria israelino consiguiera axudicase contratos del Ministeriu de Defensa n’asemeyada cantidá y volume económico”.
L’informe publícase tres cuasi 19 meses d’ofensiva israelín sobre Gaza y la so población, una ofensiva condergada dende xineru de 2024 pola Corte Internacional de Xusticia y na que, pa la ONU, fai yá más d’un añu que “hai motivos razonables pa creer que se cumple la llende qu’indica qu’Israel ta cometiendo xenocidiu”, según el so informe de marzu de 2024 sofitáu pola mayoría de les sos 34 relatores y pol Comité Especial de Naciones Xuníes sobre práctiques israelinos.

Pa los participantes en bloquéu, les afirmaciones del ministru d’Esteriores, José Manuel Albares, sobre que’l gobiernu d’España nun concede nueves llicencies d’esportación d’armamentu a Israel, nin se dexen escales a buques con armamentu con dichu destín, son contraries a los 36.7 millones d’euros que Centre Delàs calcula que se xeneraron n’importaciones d’Israel n’armes, municiones y tanques, ente otros. Tampoco coincide colos 5.3 millones d’euros n’esportaciones armamentísticas que les aduanes israelines afirmen, nin coles escales de barcos con armamentu que Progressive Internacional y Palestine Youth Movement declaren rexistrar na mariña gaditana.
Los participantes del bloquéu señalaron amás el fechu de que Elbit Systems, la principal suministradora del exércitu israelín, ye provisora de componentes a la Fábrica d’Armes y que ‘’l’esterminiu en cursu fixo crecer obscenamente los sos beneficios’’. N’España, Elbit Systems, los sos filiales y les empreses que suministren, desenvuelven y caltienen los sos productos, axudicáronse 17 contratos públicos, y anuncia qu’el 7 de xunetu va pagar los dividendos a accionistes. 
Santa Bárbara Sistemes (privatizada pol gobiernu d’Aznar y agora propiedá de la empresa estadounidense Xeneral Dynamics) beneficióse colateralmente de l’axudicación de contratos a Elbit Systems. 
El bloquéu de la fábrica asocede’l mesmu mes qu’un barcu de la Flotilla pola Llibertá zarpa escontra Gaza con ayuda humanitaria, amás de la Marcha Global dende El Cairo hasta Raffah onde ciudadanos de tol mundu van desixir el cese del bloquéu israelín nes sos fronteres. La cifra de muertos en Gaza supera los 51.000, y son 14.000 los rapacinos que sufren malnutrición nel territoriu palestín.

This work is licensed under a Creative Commons Attribution 4.0 International License.