Cuando’l sistema educativu nun pon medios onde más se precisen, nun ye equitativu: ye inxustu. Esa ye la denuncia firme —y al empar estremecedora— que faen más de 500 profesionales de la orientación educativa y de los servicios a la comunidá nel sistema públicu asturianu. Y la so denuncia ye clara: nun piden más que poder faer bien el so trabayu.

Dientro’l desenfotu pa cola comunidá educativa -docentes ya escolinos- los que más sufren les consecuencies son los más vulnerables. Reciella con necesidaes especiales desatendies, profesionales desbordaos, sobrecarga llaboral, imposibilidá d’atender bien a los escolinos, con consecuencies nefastes p’ambes partes.

La situación ta nun puntu llende: una orientadora y una profesional de servicios a la comunidá (son trabayos ocupaos mayoritariamente por muyeres) por cada 800 escolinos.  Una única mayestra d’ inmersión llingüística pa les dos cuenques enteras. Una carga descomanada que ye imposible caltener. ¿Cómo atender emocional, social y académicamente a tantu alumnáu con tán pocu personal? La recomendación de la UNESCO ye d’una profesional por cada 250 estudiantes. N’Asturies, esa cifra triplícase. El resultáu: atención mínima, intervención tardía y una dexadez absoluta del alumnáu con más necesidaes

Estos profesionales súmense a les protestes d’estos díes, porque los problemes de tola docencia tamién yos afeuta, pero quieren facer rescamplar la so situación particular.  Reclamen tiempu y recursos pa poder acompañar a guahes con necesidaes d’atención, enfermedaes, traumes graves, mocedá al esmucir del suicidiu, families ensin red de sofitu, recién llegaos al país dende llugares remotos… y a docentes qu’aguanten como pueden ante una diversidá ca vez mayor con medios cada vez menores.

Pero dende la Conseyería dízse-yos que nun puede ser. Que nun hai perres. Que ye lo que hai. Les campañes que paga l’alministración en medios contra l’acosu, d’atención a la diversidá y demás de pocu valen, dicen los profesionales, ensin una plantiya que les faiga reales. Queden en despachu y nel escaparate, comu tantes otres cuestiones. 

-Entantu, los responsables, salen de la negociación, lliteralmente, pela puerte d’atrás-.

Susana Sela

This work is licensed under a Creative Commons Attribution 4.0 International License.