Los asistentes pidieron señalar a los responsables políticos de la situación, apuntando a Adrián Barbón y Adriana Lastra.
La primer convocatoria de movilizaciones ye una concentración na Plaza l’Ayuntamientu de Xixón el prósimu xueves cinco a les siete de la tardi
Más de cien persones atarraquitaron ayeri La Casa’l Pueblu ante’l llamáu del Grupu Sofitu a Les 6 de La Suiza pa encadarmar la movilización social ante la decisión unillateral del xuez Lino Rubio de non dixebrar les dos condergues nin suspender la conderga.
Na so intervención en nome de les afectaes Hector Bywajer, un de los condergaos, agradeció el sofitu recibíu y tranquilizó a los asistentes respeutu al ánimu de les seis. Cosciente de que les probabilidaes d’entrar en prisión son de 99 a una, pidió la participación en toles acciones “Que sepáis que tamos fuertes y que nun ye momentu de compadecenos, sinon d’otres coses” aunque recordó que tres d’ellos hai families, fios, pas, pareyes, persones que van vese tamién afeutaes por esta inxusticia.
Darréu la vocera del Grupu Sofitu recordó la situación xurídica de les compañeres: a finales del mes de xineru recibieron la orden d’execución de sentencia. Nesi momentu, presentaban escritu l’acusación – el pasteleru ya’l so fiu- solicitando l’ingresu darréu en prisión. Pel so lláu les condergaes presentaron escritu individual solicitando dos coses, la separación de les dos condergues y la suspensión de la mesma.
La separación de les condergues ye importante, porque denguna de les dos superaba los dos años necesarios pa facer efeutivu l’ingresu a prisión, siendo una de dos años por obstrución a la xusticia y otra d’añu y mediu por acciones, polo que si se dixebren, nun diríen a prisión.
Nel so escritu de rempuesta el fiscal nun s’opón a denguna de las dos peticiones de les condergaes pero entá asina el xuez refuga ambes. Aunque agora mesmo hai posibilidá d’interponer un recursu ante’l xuez o ante l’Audiencia Provincial, los plazos son ya endemasiao curtios: de magar el vienres pueden deteneles en cualisquier momentu.
Por tou ello, y teniendo en cuenta tolo qu’esta situación implica no que cinca a retayu de llibertaes y precedente llegal de castigu a l’acción sindical, los asturianos y asturianes tamos llamaos a responder nes cais nes sucesives movilizaciones que dirán convocándose, adaptándose en ca momentu a la evolución de la situación, polo qu’hai que tar mui atentos a les redes sociales y grupos de sofitu.
La primera d’eses concentraciones va tener llugar el xueves cincu na Plaza Conceyu de Xixón, a les siete de la tardi. Tamién ta en procesu la convocatoria d’un manifestamientu colos sindicatos y la posible realizacion d’una antorchada na nueche San Xuan, pente otres acciones, que dirán concretándose.
Los asistentes al aconceyamientu llamaron a centrar la movilización na cai, pidieron ellevar el tonu de les acciones de protesta y apuntaron a Adrián Barbón y Adriana Lastra comu responsables políticos ya que, teniendo conocimientu dende hai tiempu asgaya de qu’esto podía ocurrir dexaron que llegare esta situación ensin mover un deu p’aparalo, lo mesmo que los sos socios de gobiernu.
La pidición del Grupu Sofitu ye que, nel momentu d’entrar en prisión, se yos conceda darréu un indultu o un tercer grau, pa que si van a la cárcele tean allí el menor tiempu posible.
Llucía F. Marqués
This work is licensed under a Creative Commons Attribution 4.0 International License.
