L’equipu de gobiernu del Conceyu de Tinéu aprebó, nel plenu d’ayeri, amortizar les cuatro places pendientes de estabilización na Escuela Municipal de Música, suprimiendo los puestos de trabayu en llugar de cumplir cola obligación que tinía d’afitar esos puestos anantes de la fin del 2024
La Escuela Municipal de Música de Tinéu ye un exemplu de cómo una institución llocal pue convertise nun elementu de xunión social, accesu equitativu a la cultura y espaciu d’alcuentru interxeneracional.
Sicasí, los cuatro mayestros que lleven más de dos décades dando clas nella vienen de perder el so puestu de trabayu. Los motivos remanaos son económicos, alegando falta de rentabilidá. Dexando a un llau si un serviciu d’esta triba tien de ser rentable o a cencielles, aportar al pueblu, los profesores denuncien que los númberos remanaos pol plenu son mentira. L’alcaldesa de Tinéu fala de 200.000 € en gastu de la escuela, unes perres que, denuncien los usuarios, nun se sabe a onde foron a parar. Na web del propiu conceyu indícase que pesllaron los gastos del exerciciu anterior (2023) con unos gastos de 83.858 euros, incluyendo personal y otros gastos señalaos como “diversos”, ensin considerar los ingresos por matrícules “les places pa usuarios tán dafechu ocupaes, cola demanda educativa cubierta, ya inclusive con llista d’espera en delles asignatures. Hai comunidá. Hai alumnáu. Hai necesidá”.
Nun ye un casu namás de la perda de cuatro puestos de trabayu, ye’l desaniciu d’un puntu d’alcuentru, recuperación y espoxigue de la tradición, la música, la cultura asturiana. Igual precisamente ye ehí onde ta’l motivu’l so preslle “Nun ye sólo una decisión alministrativa. Ye un golpe a l’alma d’un pueblu. Nun territoriu onde la iniciativa pública apágase y el silenciu apoderase de los sos requexos”.
Nel Dos Santos
This work is licensed under a Creative Commons Attribution 4.0 International License.
