Na concentración mensual cellebrada ayeri en Xixón pa denunciar les consecuencies de la violencia machista lleéronse los nomes de les 29 muyeres asesinaes no que va d’añu, d’ente unos meses y 82 años
La concentración que tolos meses denuncia delantre la Gota Llechi la violencia contra les muyeres aconceyó alrodiu d’un centenar de persones d’estremaos colectivos al pie d’una pancarta con un númberu que mes a mes medra, 29, los cuasi trenta asesinatos que nos caberos cinco meses marquen un ritmu de seis muertes al mes.
Na intervención, qu’esti mes corrió a cargu de CSI, analizóse’l camín previu que lleva al feminicidiu: entámase con micromachismos, aislamientu de la muyer, control, agresiones sicolóxiques, verbales, pa llluéu pasar a les físiques, les sesuales ya en munchos casos finar n’asesinatu o suicidiu.
Tamién dedicaron unes pallabres a remembrar la llácara del abusu sesual infantil, onde les muyeres siguen siendo les principales víctimes y los homes los principales agresores: el 96% de los agresores son homes, un 2% muyeres y l’otru 2% desconozse. El 87 % de las agresiones son a neñes y el 13% a neños.
Los convocantes son Andecha Ástur, Anticapitalistes, Amamantar, l’Asociación de Pensionistes de Xixón, l’Asociación Ecofeminista Petra Kelly d’Asturies, el Colectivu de Trabayadores, Feminismu en Llucha del CSI, la plataforma del serviciu d’ayuda a domiciliu -SAD-, Podemos y Verdes-Equo.
Susana Sela
This work is licensed under a Creative Commons Attribution 4.0 International License.
