Los sindicatos cifraron el siguimientu de la fuelga nun 96%. Ante la falta d’alcuerdu, anunciaron una nueva xornada de fuelga pal 5 de xunu si nun se atienden les sos reivindicaciones.
Ayeri, martes 27 de mayu, el profesoráu de la enseñanza pública asturiana protagonizó una xornada de fuelga y movilización que los sindicatos convocantes calificaron de “histórica”.
La protesta surdió de magar la eliminación de la xornada reducida en xunu y setiembre, una midida que la Conseyería d’Educación xustifica por razones organizatives y llexales, pero que los docentes consideren un retrocesu nes sos condiciones llaborales; sicasí, ello ye namás la pica del iceberg nuna escuela pública llastrada por problemes organizativos y pilancos llaborales, na que los docentes asturianos carecen d’unes condiciones enforma piores que les de los sos homónimos n’otres partes del estáu.
La movilización tuvo dos momentos clave en Uviéu: una concentración multitudinaria a les 12:00 hores y otra a les 18:00 na Plaza d’España, frente a la sede de la Conseyería d’Educación. Los manifestantes, munchos vistíos con camisetes negres cola Cruz d’Asturies en mariellu, portaben pancartes con llemes como “Mayestros lluchando tamién tán enseñando” y “Lydia dimisión”, en referencia a la conseyera d’Educación, Lydia Espina.
En Xixón, la movilización tomó forma d’una performance satírica llamada “Lydia Crucis”, que percorrió once colexos de la ciudá. Nesti actu, representantes sindicales escenificaron crítiques a la conseyera d’Educación, Lydia Espina, a la que acusen de devaluar la llabor docente. La performance entamó nel Colexu Públicu Jovellanos y concluyó nel Colexu Públicu Montevil, últimu centru onde Espina exerció como docente y direutora.
La situación actual refuerza la tensión ente el profesoráu y la Conseyería d’Educación, con un final de cursu marcáu pola inestabilidá y la esixencia de restablecer el diálogu pa evitar un conflictu mayor nel sistema educativu asturianu.
This work is licensed under a Creative Commons Attribution 4.0 International License.
