De magar la cellebración del ‘Día de la bandera’, la organización nacionaliega denuncia que “Barbón quier una Asturies orgullosa… pero callada. Con símbolos… pero ensin conteníu. Con historia… pero ensin soberanía. La nuesa responsabilidá ye evitar que esa operación tea ésitu”

El 25 de mayu, aniversariu de la Constitución de la Xunta Suprema, la declaración d’independencia d’Asturies y de soberanía del Pueblu Asturianu, foi declarada pol Gobiernu del Principáu, con Adrián Barbón al frente, “Día de la Bandera”, una maniobra que, pa la organización nacionaliega Andecha Astur, representa una operación política destinada a desactivar una de les feches con mayor potencial emancipador na hestoria moderna d’Asturies.

Andecha vien d’espublizar un comunicáu nel qu’acusen a Barbón de vaciar la commemoración d’esti actu de soberanía popular del so conteníu políticu, reduciéndola a una xornada d’esaltación estética y anecdótica de la bandera: “en cuentes de reivindicar soberanía, propónmos axitar una bandera azul dende la neutralidá”, denuncien.

P’Andecha Astur, esa ye la mesma táctica que se vien aplicando na cuestión de la oficialidá del asturianu, onde Barbón promete y apela al sentimientu del Pueblu Asturianu pero, en dambos casos, quedando en símbolos ermos y discursos ensin consecuencies: “Quier una identidá asturiana compatible col marcu autonómicu español, ensin rotures nin movilización. Un asturianismu de salón, servil, que nun incomode nin a Madrid nin al PSOE”.

Nesi sen, llamen a reivindicar el sentíu del 25 de mayu: “Si queremos una Asturies con voz propia, precisamos muncho más que xestos: precisamos memoria, concencia y voluntá política”.

Llucía F. Marqués