Iniciativa pol Asturianu denuncia l’incumplimientu del compromisu de torna per parte del Gobiernu

Dos años dempués de la puesta en marcha de la páxina web del Consorciu de Tresportes d’Asturies (CTA) y l’aplicación pa dispositivos móviles ‘CONECTA’, disponible pa los sistemes operativos Android y iOS, l’asturianu sigue ausente. Nel momentu del so llanzamientu, Iniciativa pol Asturianu contactó cola Conseyería de Mediu Rural y Cohesión Territorial, responsable nesi momentu de l’aplicación, pa reclamar la presencia de les llingües propies. El departamentu comprometióse a incluyir l’asturianu ente les llingües disponibles nel serviciu, cuestión que dos años después sigue pendiente.

La entidá de reivindicación llingüística llamenta los nulos nesi sen tantu nel portal web comu na aplicación de la plataforma, considerando qu’una entidá con naturaleza d’ente públicu como ye’l casu del Consorciu de Tresportes d’Asturies tien que xugar un papel importante na normalización social del idioma asina como na so visibilidá. 

D’igual mena, el colectivu recuerda la esistencia d’unos criterios de llinguaxe alministrativu en llingua asturiana que’l Conseyu de Gobiernu del Principáu d’Asturies publicó l’añu pasáu pa fomentar l’usu del idioma n’Alministración Pública. 

Estes instrucciones afiten la forma de proceder de l’alministración pública respecto al usu de les llingües propies. El documentu recueye nel puntu relativu a les páxines web y aplicaciones que “Les páxines web, aplicaciones y el restu de les ferramientas informátiques institucionales del sector públicu procurarán cuntar con una versión n’asturianu. Nes páxines web de nueva creación tendráse en cuenta qu’al menos los sos conteníos estáticos seyan billingües, en castellán y asturianu, amás d’incluyir les llingües que se considere oportuno. El so orden sedrá’l siguiente: castellanu, asturianu, eonaviego o gallego-asturiano, inglés, francés y otres llingües. Tenderáse a que polo menos un 50 % de los contenío dinámicos tean n’asturianu, principalmente los más relevantes”.

Por tou ello, la organización reclama al Consorciu de Tresportes d’Asturies un compromisu claru cola normalización de les llingües propies y col cumplimientu de la Llei d’Usu y Promoción del Asturianu, acordies cola llínia marcada pol Gobiernu autonómicu.

Susana Sela

This work is licensed under a Creative Commons Attribution 4.0 International License.