El domingu 25 la organización homenaxeará, como vien faciendo les caberes décades, a los protagonistes de la Xunta Suprema y la Declaración de Soberanía del pueblu asturianu, delantre la Sala Capitular onde tuvieron llugar esos fechos
El 25 de mayu de 1808 ye una fecha clave na hestoria d’Asturies y d’Europa. Esi díi la Xunta Xeneral proclamose, baxo la presión del pueblu asturianu, soberana, tornándose en Xunta Suprema y asumiendo tolos atributos d’un estáu soberanu, talos como un exércitu propiu (l’Exércitu Defensivu Asturianu, con 30.000 homes de tolos conceyos) ministerios, embaxadores y si, una bandera.
Ficiéronlo reconociendo esplicitamente la soberanía popular asturiana, xurando caún de los sos componentes que “ El poder, tol poder, reside y procede del pueblu”, siendo con ello la segunda declaración de soberanía popular depués de la Revolución Francesa y costituyendo’l primer actu d’autodetermín d’Asturies na dómina contemporánia, dexando nidio la voluntá de los asturianos de ser dueños del so futuru.
Fechos tan importantes, consideren dende Andecha Astur, nun puen banalizase llendándolos a cellebrar un detalle cuasique anecdóticu dientro la magnitú d’aquel mayu, comu ye la creación de la bandera d’Asturies “nun claru intentu de restar conteníu hestóricu a esta cellebración, vaciándola del so componente soberanista”.
Andecha Astur garró dende un entamu el testigu d’esta Xunta, reclamando p’Asturies la mesma soberanía y pal pueblu el mesmu poder y pa simbolizar esa continuidá ca añu per esa fecha faen una ufrienda floral al par de la Sala Capitular na que la soberanía fore declarada. Esti añu sedrá el mesmu 25 de mayu, domingu, a les doce’l mediudíe.
Llucía F. Marqués
This work is licensed under a Creative Commons Attribution 4.0 International License.
