Avilés y La Pola Siero van acoyer la proyección de la película «Flores baxo’l xelu», que da voz a muyeres víctimes y resistentes de la guerra y la dictadura franquista
Agora que se tán recordando los 50 años de la muerte del dictador Franco, lo que ye tamién dicir 50 años d’impunidá del franquismu, La Comuna d’Asturies trai a Asturies la película «Flores baxo’l xelu». Nella, al traviés d’imáxenes dibuxaes por un equipu ampliu d’artistes, faise una historia colectiva sobre les perdedores de la guerra y les víctimes de la dictadura franquista.
El filme ta protagonizáu namás por muyeres, pa lluchar contra la so doble infrarrepresentación histórica, por razones ideolóxiques y de xéneru. Son muyeres resistentes que munches tuvieron hasta güei invisibilizaes. Esta película quier dar a conocer les sos vides y la so contribución na defensa de valores democráticos en plena dictadura. Cunta cómo les más d’elles sufrieron represión, violencia y muerte nel so país, o nel exiliu obligáu como refuxaes. Tamién recuerda a aquelles que nos últimos años del réxime, nuna xeneración nueva que tomó conciencia, llucharon polos sos derechos y llibertaes, y volvieron recibir la represión y la violencia como única respuesta.
La primer proyección va ser el martes 20 de mayu, a les 19:30 hores nel Auditoriu de La Pola Siero, y la segunda’l miércoles 21, a les 18 hores na Casa la Cultura d’Avilés. Depués de cada proyección va haber un alderique abiertu.
Susana Sela
This work is licensed under a Creative Commons Attribution 4.0 International License.
