“Asoméme a to ventana
por ver que tabes faciendo
fariñes nuna madreña/
¡vaya muyer de gobiernu!”
Esta lletra d’una asturianada ye toa una inxusticia que nun la tengan declarao himnu oficial del gobiernu asturianu.
Porque, si hai una característica del nuestru gobiernu ye la del desgobiernu.
Nin quieren, nin saben, nin son a gobernar por pura inutilidá, vagancia, y, lo que ye peor, ganes de frayar a la xente cada vez que cinquen daqué.
D’esta miente, Asturies ye como un flan esbarrumbando. Nun funciona nada fuera de los chiringos del réxime clientelar que tienen equí montáu.
Y los responsables son el partíu mayoritariu nel gobiernu y los otros que los sofiten. Les izquierdes.
Pero tamién les dreches, porque’l llamáu cuantayá “Pactu del Duernu” tal paez que sigue funcionando: pa les dreches Uviéu y pa les izquierdes el gobiernu de la Xunta Xeneral. Y a tirar del tetu, que presta pola vida.
Exemplos de desgobiernu hailos a embute:
Lo de la mina de Zarréu, que sigún van saliendo informaciones cada vez fiede y apesta más. Places ensin cubrir nel SESPA; les últimes noticies cífrenles en 300. Soterramientu de la FEVE en Llangréu eternizándose otra vuelta más. La enseñanza primaria y infantil convocando fuelga, la concertada encabritada tamién, la secundaria más de lo mesmo. Propuesta d’apreta-yos les clavixes a los funcionarios.
Política llingüística reducida a subvencionines, chiringuinos y ayena a la población, especialmente a los falantes. Oficialidá convertida nuna moxiganga vergoñosa.”Extracciones” de llobos dexándose llevar por grupos de presión. Desanciu de los salmones de los nuestros ríos por nun querer facer veda dala.Xareos n’El Musel col Ayuntamientu de Xixón. Amagüestu en La Vega, n’Uviéu.
Y, d’esta miente, podríamos siguir enriestrando exemplos.
Unes vegaes l’actitú gubernamental ye la de nun facer nada, dexando que los problemes s’igüen solos o que s’esfarrapen ente les manes como un podriellu. Otres vegaes créenlos ellos onde nun tenía que los haber (el de la enseñanza rescampla nesti sen).
¿Y la xente?. ¿Y esa sociedá civil tán reivindicativo y d’izquierdes que tenemos n’Asturies?. ¿Úlo?
Pues, mayoritariamente, a niales, que pa eso tamos en primavera, recóime.
This work is licensed under a Creative Commons Attribution 4.0 International License.
