El proyectu, que ta formáu por un consorciu de 14 instituciones y 48 comunidaes llingüístiques, centraráse en promocionar el capital llingüísticu non sólo dende la perspectiva de protexer la diversidá llingüística, sinon tamién amosar cómo falantes de llingües diverses pueden fomentar los componentes económicos, demográficos, sociales y de salú del capital humanu

La Rede Europea d’Igualdá Llingüística (ELEN), entidá a la que pertenez Iniciativa pol Asturianu, ta acabante d’anunciar el llanzamientu de FOSTERLANG, un proyeutu que ñaz baxo l’entítulu ‘Promocionando’l capital llingüísticu: una fueya de ruta pa revertir la crisis de diversidá y activar beneficios sociales n’Europa’. El nuevu proyeutu insinia européu, entamáu el primeru de mayu, cunta con un presupuestu de 3 millones d’euros pa dar puxu a llingües minorizaes y promocionar el capital llingüísticu européu.

El proyeutu, financiáu pola Comisión Europea so’l programa Horizonte Europa, quier tener un efeutu tresformativu en cómo’l capital llingüísticu ya humanu de los falantes de llingües minorizaes y migrantes ye reconocíu, valoráu ya reforzáu pa beneficiu de les sos comunidades y d’Europa en xeneral.

El proyeutu ta formáu por un consorciu de 14 instituciones y 48 comunidaes llingüístiques que combinen la so especialidá en llingüística decolonial, política llingüística, recuperación llingüística, antropoloxía social, educación plurillingüística y pedagoxía, planificación llingüística y tecnoloxía de la innovación. FOSTERLANG incluirá estudios comparativos, desenrollos ente casos ya implementaciones pilotu de soluciones práutiques.

Un de los mayores resultaos sedrá una Fueya de Ruta del Capital Llingüísticu, qu’afitará delles recomendaciones sustanciales con estratexes efeutives y significatives a curtiu, mediu y llargu plazu pa promocionar el capital llingüísticu d’Europa y protexer les llingües minorizaes. Estes recomendaciones presentaránse a la Xunión Europea, les Naciones Xuníes, el Conseyu d’Europa, la Organización pola Seguridá y la Cooperación n’Europa (OSCE), la UNESCO y los gobiernos al cabu’l proyectu. 

El secretariu-xeneral d’ELEN, Davyth Hicks, declaró: “Tamos encantaos de poner Fosterlang a trabayar y de tener el sofitu d’Horizonte Europa. Ta destináu a ser un proyeutu européu insinia clave pa guiar polítiques llingüístiques na Unión Europea nos vinientes años. Como la principal organización representante de llingües europées minorizaes y en peligru, ye vital disponer d’investigación concreta y precisa p’ayudanos a ser más efeutivos na nuesa campaña pa protexer les nueses llingües”.

“Con Fosterlang, trabayaremos con un equipu punteru d’espertos llingüísticos a nivel mundial con un ampliu rangu d’esperiencia. Pa nós, ye importante tener esta alianza ente la sociedá civil ya’l mundu académicu, especialmente no tocante a obtener mensaxes clave del proyectu pa les nueses comunidaes llingüístiques a nivel base.

El proyeutu, de trés años, va tar llideráu pola Universidá de Varsovia, en comuña con ELEN, Linguapax International, la Universidá Adam Mickiewicz en Poznań, l’Institutu de Psicollingüística Max Planck, Euskal Herriko Unibertsitatea, la Universidá d’Oslo, la Universidá de les Highlands and Islands, Prifysgol Cymru Y Drindod Dewi Sant, la Universidá de Dublin City, ya Pädagogische Hochschule Kärnten. A ellos uniránse-yos organizaciones ensin porgüeyu económicu representando Kashubian, Lemko y Wymysorys (Naja Skola, Association Ruska Bursa y Association Wilamowianie), organizaciones miembro d’ELEN, ente les que ta Iniciativa pol Asturianu, y otres comunidaes llingüístiques collaboradores.

Susana Sela

This work is licensed under a Creative Commons Attribution 4.0 International License.