L’Audiencia Provincial d’Asturies vien de confirmar l’absolución de los dos trabayadores de la empresa ALSA, xulgaos el 20 xineru d’esti añu, pola so participación na güelga de 2020
El 5 d’ochobre de 2020 los y les trabayadores del Grupu d’Empreses ALSA entamaben una füelga col envís de recuperar al 100% les llinies y frecuencies d’autobuses y el serviciu de taquilles, poner frenu a los numberosos despidos que taben produciéndose y facer cumplir la normativa llaboral afitada nel conveniu coleutivu, midíes que la empresa ALSA impunxere demientres la pandemia de Covid 19.
La füelga tuvo un siguimientu total de la plantiya, y les asociaciones vecinales y coleutivos sociales convocaren importantes manifestaciones de sofitu a les reivindicaciones de los y les trabayadores.
Lloñe d’atender eses reclamaciones, la emprea de tresporte denunció desperfeutos nos sos autobuses, acusando d’ello a les y los trabayadores, dos de los cualos enfrentáronse a una petición de 3 años de prisión pa caún, fechu que desencadenó una fuerte rempuesta social.
Los fuelguistes foren absueltos pol Xulgáu númberu 3 de lo Penal de Xixón, depués de lo que la Fiscalía decidiere nun recurrir, ante la contundencia la sentencia, que demostraba la inocencia de los dos trabayadores.
Sicasí, la empresa ALSA decidió recurrir en solitariu a l’Audiencia Provincial, que tamién dio la razón a los trabayadores.
Dempués de cuatro años de congoxa, los enxuiciaos esperen qu’ALSA dea por termináu esti llamentable capítulu d’intentar acabar cola llucha sindical na so empresa y reclamen qu’asuman responsabilidaes les persones que decidieron facer pasar por esti trance tantu a los trabayadores absueltos como a les decenes de trabayadores que tamién tuvieron qu’acudir a comisaríes, cuarteles y xulgaos, solo pol fechu de defender los derechos de los y les trabayadores del grupu ALSA y de les pasaxeres y pasaxeros.
Llucía F. Marqués
This work is licensed under a Creative Commons Attribution 4.0 International License.
