La propiedá del grupu proisraelí KKR de dellos festivales, incluyendo’l Tsunami, lleva a la desbandada de grupos que se nieguen a tocar pa ellos
La conexón ente la industria musical y los fondos d’inversión internacionales quedó al descubiertu esta selmana dempués de qu’una investigación de El Salto revelare los venceyos ente l’empresarial KKR (Kohlberg Kravis Roberts) y les actividaes d’ocupación del Estáu d’Israel en territorios palestinos.
KKR ye un fondu d’inversión norteamericanu con intereses bien diversos, dende tecnoloxía y ciberseguridá hasta medios de comunicación y promoción inmobiliaria. Una parte significativa de les sos operaciones internacionales realícense a través del conglomeráu alemán Axel Springer, del que son inversores mayoritarios dende 2019. Axel Springer ye propietariu de medios como Politico, Die Welt, Business Insider o Bild, y al empar ye responsable d’una plataforma inmobiliaria israelina llamada Yad2, que ufierta viviendes en territorios ocupaos como Xerusalén Este o Cisxordania. En 2024, anunciaben nel so portalu que “Yad2 ayudate a construyir el to futuru n’Israel”, ufriendo terrenos illegalmente ocupaos según el derechu internacional. A nivel tecnolóxicu, KKR impulsa estructures que sirven a los intereses israelinos. Nel añu 2021, financiaron la empresa Global Technical Realty (GTR), creada espresamente pa diseñar y xestionar centros de datos en Europa y Oriente Próximu. Un de los sos principales proyectu ye un centru de datos de 10,5 MW en Petah Tikva, una ciudá alzada por Israel en territoriu históricamente palestín. L’espaciu, qu’ocupa más de 4.800 metros cuadraos, ye una de les instalaciones d’esi tipu más grandes del país.
La implicación de KKR en sectores sensibles como la seguridá informática concretóse col control de Optiv, empresa qu’entamó collaboración cola firma israelina IntSights, fundada por exoficiales de les FDI (Fuerces d’Israel). Esti tipu d’aliances amuesen la orientación estratéxica del fondu escontra la infraestructura militar y de control d’Israel.
El fondu ta dirixíu por Henry Kravis y George Roberts, dos multimillonarios xudíos d’EE.UU. Kravis, especialmente activu políticamente, foi donante d’un millón de dólares pa la investidura de Donald Trump en 2016 y tamién participó na campaña de Nikki Haley, conocida por escribir “acaben con ellos” nun misil israelín dirixíu a Gaza. Kravis ye, amás, donante recurrente en proyeutos culturales afines al Estáu d’Israel.
Nesti contestu, los venceyos empresariales de KKR tamién se estendieron al sector musical. Dende 2024, son los propietarios de Superstruct Entertainment, la empresa que controla más de 80 festivales de música nel mundu. Nel estáu español tán detrás d’una llarga llista de grandes eventos como’l Sónar, Viña Rock, FIB, Arenal Sound, Brava Madrid, Festival de Les Arts, Interestelar, Elrow Ibiza, Amnesia, O Son do Camiño, entre munchos otros. N’Asturies, tan al frente del Tsunami, polo que a la vista d’esti entramáu financieru y políticu —que va dende los escenarios musicales d’Europa hasta los túneles de datos baxu tierra en Israel— pídese un boicó a la so participación, tantu como bandes comu a nivel de públicu.
Bandes de dellos países europeos anunciaron ya públicamente la so retirada d’estos festivales. Grupos como La Prados, Sons of Aguirre, Reincidentes, Dakidarría, Sínkope, Manuka Honey, Juliana Huxtable o High Paw manifestaron el so refugu a collaborar con lo que consideren parte d’un aparatu de blanquéu y normalización del xenocidiu israelín en Gaza.
Estes bandes esgrimen razones de conciencia. “Nun mos paez necesario esplicitar qué pensamos sobre collaborar con una cadarma empresarial que ye cómplice d’una llímpieza étnica que mató a más de 60.000 persones, incluyíos 17.000 neños”, escribieron Sons of Aguirre al anunciar que nun volveríen a dengún festival controláu por KKR.
Pese a les crecientes crítiques, la única respuesta pública por parte de les organizadores foi la del festival Sónar, que bloqueó l’accesu a les sos espublizaciones na rede X y asoleyó un comunicáu nel que s’evitó mentar direutamente nin a Israel nin al pueblu palestín. Nel testu, defendíen la diversidá y la llibertá d’espresión, condergando la violencia de forma xeneral, pero ensin facer referencia a la situación concreta.
Llucía F. Marqués
This work is licensed under a Creative Commons Attribution 4.0 International License.
