Avérase’l 25 de Mayu y, venceyáu a él, el denomináu, dende hai unos pocos años, Día de la Bandera Asturiana, cellebración entamanada pol gobiernu asturianu. Remebrar esa fecha histórica tien abondos años, porque entamó con ello Conceyu Bable. Pero hai daqué que nos rincha en tou esti asuntu.
Porque lo que se cellebraba, mientres bien d’años, yera l’alcordanza de la capacidá del pueblu asturianu y la so institución cimera d’autogobiernu, la Xunta Xeneral, pa garrá les riendes del so destín, remanar el mayor poder que se pueda dar, como ye la soberanía sobre’l propiu territoriu , y planta-y cara a la mayor potencia de la so época. Resumiendo: autogobiernu, soberanía y prestixu de la Xunta Xeneral.
Y, ente los fechos destacables, taba tamién la de la creación de la bandera asturiana a propuesta de Xovellanos pa dirixir a los exércitos asturianos. Nun hai dulda de qu’eso foi importante. Eso equí nun se discute, que tan fatos nun somos.
Pero tampoco nun tenemos dulda, polo menos nós asina lo vemos, de qu’esi nun foi’l fechu que más rescampla, d’aquellos acontecimientos.
Y, al llegar equí, podríamos entrugamos por qué, cuando’l gobiernu asturianu decidió cellebrar con un actu institucional aquelles dómines, bautizóles como tal Día de la Bandera Asturiana.
Pues camentamos nós que lo fixo y fai pa esconder con ello otra cosa que-yos resquema bastante: l’autogobiernu, la reivindicación de que tengamos un techu competencial de primer nivel neto que lu tienen notres naciones del Estáu, l’asoleyar qu’Asturies tuvo na so época les agalles y brenga pa declarase soberana nada menos. Asina que meyor centrase na bandera, que nun manca, que na política d’algamar competencies, de puxar por una mayor capacidá p’autogobernanos, qu’eso da tarrecimientu y perceguera.
Nun nos tien que cayer embaxo que los dos pegollos onde se sofiten los discursos políticos identitarios, yá non solo nel gobiernu asturianu, sinón nes fuerces polítiques que lu apoyen (na oposición yá nin eso) dende abeyayá, seyan los de la oficialidá “amable” pal asturianu y eonaviego y, una vez al añu, facer una llamadina pa que pongamos la bandera de nuestro nos balcones.
Pero d’autogobiernu, d’ampliar el nuestru techu autonómicu, de reivindicar la nuestra historia como país con toles consecuencies, d’averanos a les autonomíes potentes…d’eso meyor nun gorgutiar.
Asina que quien s’afaye como gatu n’escarpín con camudá’l 25 de Mayu nun simple homenaxe a la bandera asturiana, ta nel so perfechu drechu a ello, faltaría más.
Pero que quede claro qu’esa fecha histórica de nuestro tien un caláu y un significáu muncho más fonderu y va xuníu, repitímoslo otra vuelta, a la capacidá que la xente asturiano y la so institución cimera, la Xunta Xeneral, pa garrá les riendes del so destín con toles consecuencies. Y, puestos a reivindicar y homenaxear, ye esto cabero lo que mos paez más axustao a aquellos fechos y de más xacíu.
Pero, claro, eso manca a tou esti tingláu políticu qu’escoyemos una y otra vuelta pa representanos y que tien perdemostrao, per décades yá, qu’esto de la “autonomía” nun-yos resulta un platu apetecible.
Muncho menos seguidismu pa colos sos discursos y iniciatives y muncha más capacidá crítica, vendríanos de viciu. Miániques que sí.
This work is licensed under a Creative Commons Attribution 4.0 International License.
